Joriy yilning 27 noyabr kuni filologiya fakulteti professor-o`qituvchilari Jondor tuman 6-maktabiga tashrif buyurib, kitobxonlik tadbirini tashkil etdilar. Tadbirni kirish soʼzi bilan maktab direktori Ulugʼbek Joʼraev ochib berdi. U.Joʼraev oʼz soʼzida soʼnggi yillarda hukumat tomonidan taʼlim, bilim olish, kitobxonlik, xorijiy tillarni oʼrganish masalalariga katta eʼtibor berilayotgani, bu borada amalga oshirilayotgan keng miqyosli ishlar haqida gapirdi. Tashkil etilgan tadbirning maqsadi haqida fikr yuritib, uning Prezident tomonidan ilgari surilgan 5 ta muhim tashabbus, bugungi kun taʼlimi oldidagi vazifalar bilan uzviy bogʼliqligi, asosiy maqsad esa bilim olish ekanligi, kelajak avlodning bilimli, zamon talablariga javob bera oladigan kadrlar boʼlib yetishishi ekanligini alohida taʼkidladi. Soʼngra taklif etilgan mutaxassislarni tanishtirdi hamda soʼzni BuxDU dotsenti, filologiya fanlari nomzodi Аnvar Haydarovga berdi. А.А.Haydarov oʼz nutqida bugungi kun taʼlimi oldida turgan vazifalar, oʼquvchilarning bilim olishi, bu borada yaratilgan sharoit va imkoniyatlar, xorijiy tillarni oʼrganish, bir yoki bir necha chet tilini bilish bugungi kun mutaxassisi uchun asosiy talab ekanligiga eʼtibor qaratdi. Kitobxonlik boʼyicha Prezident tashabbusining mazmun-mohiyati haqida soʼzga chiqqan dots. B.Kilichev esa kitob, kitob oʼqish, uning samarasi, inson ongining shakllanishi va rivojlanishida muhim omil ekanligi borasida oʼz fikrlarini bayon etdi. А.Haydarov va B.Kilichevlar tadbir ishtirokchilarining bir qator savollariga javob berdilar. Tadbir soʼnggida А.Haydarov “Inglizcha-oʼzbekcha-ruscha soʼzlashuv kitobi”ni, B.Kilichev “Oʼzbek tiliga oʼzlashgan xorijiy soʼzlar lugʼati”ni maktab kutubxonasi fondiga taqdim etdilar. Savol-javob tarzida qiziqarli oʼtgan tadbir oʼquvchilarda yaxshi taassurot qoldirdi.