Har bir millatning o‘ziga xos faxri iftixori bo‘lmish bayrog‘i mavjud. Bugun biz o‘zbek xalqining davlat timsoli bo‘lmish bayrog‘imizning 28 yilligini yurtimiz bo‘ylab keng nishonlamoqdamiz. 1991 yil 18 noyabr mamlakatimiz milliy ramzlaridan biri Davlat bayrog‘i qabul qilingan kun sifatida tarixda muhrlanib qoldi. Or-nomusimiz, g‘ururimiz, millatimiz faxri bo‘lmish bayrog‘imiz mana 28 yildirki O‘zbekistonni butun dunyo maydonlarida kuch-qudratimizni namoyon etib, hilpirab turmoqda. Bayrog‘imiz, chinakam ma‘noda, xalqimizning asriy madaniyati, urf-odatlari va pok islom dinining umuminsoniy g‘oyalarini o‘zida mujassamlashtirgan. Buxoro davlat universitetida ham milliy ramzimiz bayroqqa bag‘ishlangan tadbir Ma‘naviyat va ma‘rifat markazi Buxoro viloyati filiali, Buxoro davlat universiteti Yoshlar bilan ishlash, ma‘naviyat va ma‘rifat bo‘limi hamda universitetning Tarix va madaniy meros fakulteti bilan hamkorlikda tashkil etildi. Tadbirda “Jahon adabiyoti” jurnali bosh muharriri, Ma‘rifat targ‘ibotchilar jamiyati a‘zosi Axmadjon Meliboyev ishtirok etib, talabalarga bayrog‘imizning shon shavkati, xorijda yurgan o‘zbeklar uni bir misqol tuproqdek ko‘zga surishi, vatan uchun g‘urur, iftixor ramzi ekanligini ta‘kidlab o‘tdi. Ma‘rifat targ‘ibotchisi A.Meliboyev “Bugungi kunda bayrog‘imizga bo‘layotgan e‘tiborni respublikamiz bo‘ylab o‘tkazilayotgan tadbirlardan anglash mumkin. Bayrog‘imizning jahon arenalarida yuqori ko‘tarilganini ko‘rib yana bir bor suyundim, xuddi o‘zim g‘olib bo‘lgandek ko‘nglim iftixorga to‘ldi, ko‘zimda yosh yiltiradi. Yoshlarimizni Vatanga sadoqat, mehr-oqibat, urf-odatlarimizga sodiq qolgan holda tarbiyalashimiz, tilimizga, davlat ramzlariga, e‘tiqodimizga xiyonat qilmay ulg‘aytirishimiz, ma‘naviyatimizni dunyoga tanitishimiz barchamizning burchimiz” deya da‘vat etdi. Shuningdek, Buxoro davlat universiteti Milliy g‘oya, ma‘naviyat asoslari va huquq ta‘limi kafedrasi dotsenti, tarix fanlari nomzodi SS. Raupov so‘zga chiqib, bayroqning qabul qilingan kun to‘g‘risida so‘zlab berdi. Bayroqning uzoq tarixdagi o‘rni, mohiyati to‘g‘risida talabalarga tushuncha berib o‘tdi. Buxoro davlat universiteti Milliy g‘oya, ma‘naviyat asoslari va huquq ta‘limi yo‘nalishi 2 bosqich talabasi M.Komiljonov so‘zga chiqib, “Faxrimsan, g‘ururimsan bayrog‘im” mavzusida tengdoshlariga ma‘ruza qildi. Tadbir so‘ngida Milliy g‘oya, ma‘naviyat asoslari va huquq ta‘limi kafedrasi dotsenti, tarix fanlari nomzodi SS. Raupov talabalar orasida daavlat ramzm bayroqqa bag‘ishlab savol javob o‘tkazib, faol talabalar sovg‘alar bilan taqdirlandi.
