4-sentyabr kuni Ijtimoiy tarmoqlarda Buxoro davlat universiteti Аgronomiya va biotexnologiya fakulteti talabalarining yangi binoga ko’chirilishi, u yerda zaruriy shart-sharoitlarning yo’qligi yuzasidan e'tirozlar e'lon qilindi. Bu e'tirozlar universitet va fakultet rahbariyati uchun yangilik emas. 2019 yilning 30 avgust kuni bir guruh talaba va ularning ota-onalari bilan rektor O.X. Xamidov shaxsan uchrashib, talabalar o’qishining boshqa binoga ko’chirilishi bilan bog’liq vaziyat yuzasidan batafsil tushuntirish berdi. Qariyb bir yarim soat davom etgan uchrashuvda ushbu mavzu atroflicha ko’rib chiqildi.Gap shundaki, joriy yilning mart oyida muhtaram Prezidentimiz Sh.M. Mirziyoyev viloyatimizga tashrif buyurdilar. Tashrif davomida Buxoro viloyatining ijtimoiy-iqtisodiy rivojlanishini o’rganish barobarida davlatimiz rahbari davr talabiga mos bo’lgan yuqori malakali kadrlar tayyorlash masalasiga alohida to’xtalib, respublika va viloyat ehtiyojidan kelib chiqqan holda qishloq xo’jaligi sohasi uchun tajribali mutaxassislarni tayyorlash borasida qimmatli tavsiyalar berdilar. Xususan, mintaqa xususiyatini inobatga olib, agronomiya va biotexnologiya ta'lim yo’nalishlarini joriy qilish hamda mazkur sohalarni rivojlantirish bo’yicha zaruriy vazifalar belgilandi. Shu asosda o’tgan davr mobaynida agronomiya va biotexnologiyaga oid ilmiy-amaliy izlanishlar olib borildi, soha vakillari bilan hamkorlikda istiqbolli faoliyat yo’nalishlari aniqlashtirildi, bo’lajak fakultetning moddiy-texnik bazasini shakllantirish uchun iqtisodiy asoslar kelishib olindi. Bundan tashqari universitet kontingentining oshib borishini hisobga olib va fakultet o’quv –tarbiyaviy jarayoni uchun qulay sharoitlar yaratish maqsadida Oliy va o’rta maxsus ta'lim vazirligi hamda viloyat hokimligiga murojaat qilinib, alohida bino ajratish so’raldi. Rahbariyat xulosasiga ko’ra, Buxoro tumani Rabotiqalmoq qishlog’i, Yangiobod ko’chasi joylashgan Buxoro tumani sanoat kasb-hunar kolleji binosi universitet tasarrufiga o’tkazilib, talabalari soni va yangi fakultet xususiyatini inobatga olgan holda yangi fakultetni ushbu binoga ko’chirishga qaror qilindi. Sobiq kollej binosida o’quv jarayoni uchun barcha shart-sharoitlarni yaratish bo’yicha tadbirlar amalga oshirilmoqda. Jumladan, uning moddiy texnik bazasini yanada mustahkamlash, atrofini obodonlashtirish, o’quv auditoriyalarni Internet tarmog’iga ulash va o’quv-texnika vositalari bilan ta'minlash, oshxona, kutubxona va bufet tashkil etish, qolaversa tibbiyot punktini yo’lga qo’yish bo’yicha ishlar boshlangan. Fakultetning yangi binosi Buxoro shahri markazidan chetda (10.5 km) joylashganligi bois, universitet Bosh binosi va sobiq qollejgacha bo’lgan masofada avtobus yo’nalishini yo’lga qo’yish va imtiyozli yo’l kira haqqini belgilash bo’yicha viloyat hokimligiga murojaat qilindi. Shuningdek, fakultet hududida birinchi tibbiy yerdam ko’rsatish uchun tibbiyot xonasi mavjud. Talabalar sport bilan muntazam shug’ullanishlari uchun katta sport zali ham tayyor holatga keltirilgan.Yoshlarni oliy ta'lim bilan qamrab olish, ularga zamonaviy bilim va ko’nikmalarni berish masalasi davlat siyosati darajasiga ko’tarilganligi hech kimga sir emas. Qolaversa, jahon oliy ta'lim tizimida bunday tendentsiyaning kuchayib borishi kuzatilmoqda. Viloyatning otaxon ta'lim muassasasi hisoblangan Buxoro davlat universiteti talabalari ham bugungi kunda oliy ta'lim tizimiga qo’yiladigan yuqori talabni to’g’ri talqin qilib, bunga hamohang tarzda barcha sa'y-harakatlarini bilim olish va malakali mutaxassis bo’lishga qaratishlari maqsadga muvofiq deb hisoblaymiz. Shu bilan birga, universitet rahbariyati mazkur vaziyat bilan bog’liq barcha savollarga javob berishga tayyor.Talabalar o'zlari tomonidan berilgan barcha savollarga ijobiy javob olishdi. BuxDU rektori O.X. Xamidov talabalar ota-onalari bilan suhbatda. Fakultet oshxonasida talabalar va ularning ota-onalari uchun turli hildagi taomlar tayyorlanmoqda.Talabalarga tushlik qilish uchun sharoit yaratilmoqda.Fakultet binosiga yetib borishda yangi zamonaviy Isuzu avtobus qatnovlari yo'lga qo'yilmoqda. Ular har kuni ertalab soat 8:00 da universitet bosh binosi oldidan talabalarni fakultet binosi tomon olib boradi.Fakultet atrofidagi obodonlashtirish ishlari.Fakultetning sport zali
