Buxoro davlat universitetida O‘zbekiston innovatsion rivojlantirish vaziri o‘rinbosari Yo‘lbarsxon Mansurov bilan uchrashuv bo‘lib o‘tdi.Erkin muloqot sifatida tashkil etilgan davra suhbatida viloyatdagi barcha oliygohlarning prorektorlari, sohaga taaluqli fakultetlar dekanlari, ilmiy ishlanma va loyihalarga ega professor-o‘qituvchilar ishtirok etdilar.Yurtimiz eng katta ilmiy salohiyatga ega mamlakatlardan. Olimlarimiz tomonidan ko‘plab ilmiy loyihalar yaratilgan, lekin ularning ilmiy yechimlarining amaliyotga tadbiq etilishi qoniqarsiz ahvolda-dedi vazir o‘rinbosari. – Qolaversa, ko‘p mahsulotlar mamlakatimizga chetdan qimmat narxda import qilib olib kelinmoqda. Prezidentimiz import qilinayotgan mahsulotlarni o‘zimizda ishlab chiqarish lozimligini bir necha bor ta’kidlab o‘tdilar.Xo‘sh, biz ilmiy ishlanmalarimizni qachon tijoratlashtiramiz? Bugungi kunda respublikamizda 91 ta akademik bor. Ularning atigi 25 tasi jahon miqyosidagi nufuzli gazeta va jurnallarda maqolalar chop ettiryapti. Qolganlar nima ish qilyapti? Olim degan nomimiz bor, ilmiy ishlanmalarimizni dunyoga namoyish etaylik. Respublikamiz iqtisodiyotini ko‘tarishga safarbar etaylik. Bu olimlarimizni ham ma’naviy, ham moddiy imkoniyatlarini yuksaltirishi shubhasiz.Vazirligimiz har yili turli innovatsion ishlanmalar, loyihalar bo‘yicha grant e’lon qiladi. Bu ilmiy ishlanmalarni tijoratlashtirish imkonini beradi. Shunday ekan tanlovdan samarali foydalanish kerak. Biz sizlarni har tomonlama qo‘llab-quvvatlashga tayyormiz.Shundan so‘ng Buxoro davlat universiteti rektori A.To‘laganov universitet olimlari tomonidan bir qator ilmiy ishlanmalar, jumladan Suvni chuchuklashtirish, baliqchilik bo‘yicha yangi texnologiya, tekstil sohasida mahsulotlarni ohorlashtirishning yangi yo‘llari yaratilganligi, endi ularni amaliyotga taqdim etishga imkon yaratish lozimligini ta’kidladi.Bundan tashqari vazir o‘rinbosari prorektorlar, ilmiy ishlanmalarga ega olimlar fikrlarini tingladi va savollariga javob qaytardi. Innovatsion rivojlantirish vazirligi yuksak natija beradigan barcha ilmiy ishlanmalarni qo‘llab-quvvatlashini bildirdi.Uchrashuv so‘ngida hamkorlikda faoliyat yuritishga kelishib olindi. Mannon Otaboy,BuxDU matbuot kotibi
