Ma’lumki, mamlakatimizda oliy ta’lim tizimini yanada takomillashtirish yo‘nalishida bir qator islohotlar amalga oshirilmoqda. Oliy ta’lim oldiga qo‘yilgan bugungi talablardan biri – turdosh institut va universitetlar bilan xalqaro hamkorlikni yo‘lga qo‘yishdan iborat. Bu sohada Buxoro davlat universitetida ham keng ko‘lamli ishlar amalga oshirilmoqda.Jumladan, universitetning Pedagogika fakulteti Musiqa ta’limi kafedrasi professor-o‘qituvchilari jamoasi bir necha yildan buyon Rossiyaning Chelyabinsk madaniyat instituti olimlari bilan hamkorlik qilib kelishmoqda. Joriy yilning 4-9 fevral kunlari shu institutning etakchi olimlari: institut Pedagogika kafedrasi professori Gulsina Yakupovna Grevcheva, Musiqa ta’limi kafedrasi mudiri, pedagogika fanlari nomzodi, dotsent Anna Pavlovna Xmeleva, Xor dirijyorligi kafedrasi mudiri Leonid Ivanovich Eryominlar Buxoro davlat universitetida bo‘lishdi. Pedagogika fakulteti Musiqa ta’limi kafedrasi olimlari bilan faoliyat olib borishdi. O‘tgan bir hafta davomida ular bo‘lim talabalariga mahorat darslari tashkil etishdi, ilmiy davralar o‘tkazishdi. Bu tadbirlarni tashkil etishda Musiqa ta’limi kafedrasi mudiri, pedagogika fanlari nomzodi, dotsent Bahrom Madrimov, kafedra dotsentlari, pedagogika fanlari nomzodlari Sanoqul Do‘stov, Shoira Norova, Sattor Shukurovich Murodov, Jo‘rabek Yarashev, va boshqa professor o‘qituvchilar faol ishtirok etdilar. Hamkorlik tadbirlarining eng mazmunli kuni joriy yilning 8-fevralida bo‘lib o‘tdi. Shu kuni Chelyabinsk madaniyat instituti olimlari, Buxoro viloyati san’ati namoyandalari va Musiqa ta’limi yo‘nalishi professor o‘qituvchilari va iqtidorli talabalari ishtirokida juda katta konsert dasturi namoyish etildi. O‘zbek va rus xalqlari san’ati, madaniyati targ‘ibiga bag‘ishlangan bu musiqiy kecha qatnashchilarda iliq taassurotlar uyg‘otdi.BuxDU Musiqa ta’limi kafedrasi va Chelyabinsk madaniyat instituti olimlari o‘rtasida hamkorlik aloqalarini yanada mustahkamlashga kelishib olindi, kelajakdagi rejalar belgilab olindi. Jumladan, yangi o‘quv yilida ikki oliy o‘quv yurti o‘rtasida qo‘shma kafedra tashkil etish, magistratura ta’lim yo‘nalishini ochish, mazkur ta’limning bir yilini BuxDUda, bir yilini esa Chelyabinskda o‘qish takliflari ma’qullandi. Aytish mumkinki, bu yo‘ldagi amaliy harakatlar boshlab yuborildi. Umuman olganda, bir haftalik ilmiy tashrif universitetimizning xorij oliy o‘quv yurtlari bilan xalqaro hamkorlikni yo‘lga qo‘yishida, Buxoroda musiqani rivojlantirishda yana bir yangi qadam bo‘ldi.Dilrabo Quvvatova,BuxDU professori, filologiya fanlari doktori
