Hamkorlik shartnomasi imzolandi Ayni damda Buxoro davlat universiteti kichik majlislar zalida Buxoro davlat universiteti va Tojikiston Respublikasi Fanlar akademiyasi iqtisodiyot va demografiya instituti, Rossiya-Tojikiston (slavyan) universiteti hamda S.Ayniy nomidagi Tojikiston davlat pedagogika universitetlari bilan hamkorlikda “Markaziy Osiyo mamlakatlarida turizmning taraqqiy etishi-hudud aholisining ijtimoiy-iqtisodiy va madaniy taraqqiyoti rivojlanishining omili sifatida” deb nomlangan xalqaro ilmiy-amaliy seminar bo‘lib o‘tmoqda.Seminarni Buxoro davlat universiteti rektori iqtisodiyot fanlari doktori O.X.Xamidov kirish so‘zi bilan ochib, ikki qardosh mamlakatlarning ilmiy muassasalari hamkorligini yanada yuqori pag‘onalarga ko‘tarish borasida fikrlar bildirdi.Tojikiston Respublikasi Fanlar akademiyasi iqtisodiyot va demografiya instituti direktor o‘rinbosari, iqtisodiyot fanlari doktori professor A.B.Mirsaidov do‘stona qabul va iliq so‘zlardan minnatdorligini ta’kidlab, bu hamkorlik ikki davlat prezidentlari ta’kidlaganlaridek uzoq tarixga ega. - So‘nggi ikki yilda bu rishtalar yanada mustahkamlanayotganidan xursandmiz. Bugungi tuziladigan shartnoma ham fikrimiz isbotidir- dedi olim. Shundan so‘ng Buxoro davlat universiteti va Tojikiston Respublikasi Fanlar akademiyasi iqtisodiyot va demografiya instituti o‘rtasida ilmiy-texnik, ijtimoiy-iqtisodiy sohalarda hamda oliy malakali kadrlarni tayyorlash bo‘yicha ilmiy hamkorlik shartnomasi imzolandi. Unga ko‘ra birgalikda ilmiy tadqiqotlar olib borish, xalqaro simpozium, konferensiya va seminarlar o‘tkazish, darslik va o‘quv qo‘llanmalar, jamoaviy monografiya, ilmiy maqolalar to‘plamlari nashr etish, iqtisodiyot, demografiya, ijtimoiy va turizm sohalarida oliy malakali kadrlarni tayyorlash maqsadida tayanch doktorant va magistrantlarni amaliyoti va stajirovkasini tashkil etishga ko‘maklashish, ikki yoqlama ilmiy, ta’lim, turistik va boshqa sohalarda tadbirlar tashkil etishga kelishib olindi. Shundan so‘ng “Markaziy Osiyo mamlakatlarida turizmning taraqqiy etishi- hudud aholisining ijtimoiy-iqtisodiy va madaniy taraqqiyoti rivojlanishining omili sifatida” deb nomlangan xalqaro ilmiy-amaliy seminar boshlandi. Seminarda Buxoro viloyat Turizm departamenti boshlig‘i o‘rinbosari Jahongir Sharipov “Buxoro viloyatining turistik potensiali” mavzusi bilan chiqish qildi. Seminar qizg‘in davom etmoqda. Mannon OtaboyBuxDU matbuot kotibi
