Turizm fakultetida viloyat iqtisodiyotining turli jabhalarida faoliyat olib borayotgan tadbirkorlik subyektlari bilan yaqin aloqalar yoʻlga qoʻyilgan. Fakultet a’zolari doimiy ravishda tadbirkorlar bilan uchrashuvlar oʻtkazib, tajriba almashinish, bitiruvchilarni korxonalarga amaliyotga uzatish, konsalting yordami koʻrsatish, kichik sanoat zonalarida ishlab chiqarishni yoʻlga qoʻyish borasida fikr almashib kelishmoqda.“Faol tadbirkorlik, innovatsion gʻoyalar va texnologiyalarni qoʻllab-quvvatlash yili” davlat dasturi ijrosi doirasida shunday koʻrinishdagi hamkorlik shahrimizning kichik sanoat zonasida joylashgan “Tadqiqot Biznes Konsalting” MChJ hamda “Ozodbek Universal Servis” MChJ bilan amalga oshirilmoqda. Joriy yilning yanvar oyida fakultetdan doimiy ishchi guruh ushbu korxonaning yangi tashabbuslari bilan tanishib, samarali faoliyatni boshlash borasida maslahatlar berib kelgan edi. Keyingi davrlarda ham bir necha marotaba mazkur korxonalarga tashrif buyurildi.15-noyabr kuni esa ishchi guruh a’zolari toʻliq salohiyatda ishga tushishga tayyorlanayotgan ikkala korxonada soliq tizimidagi yangiliklar va kichik sanoat zonalaridagi korxonalar faoliyati uchun taqdim qilinayotgan imtiyozlar borasida xabardorlikni oshirish maqsadida tadbirkorlar bilan uchrashishdi. “Tadqiqot Biznes Konsalting” MChJda togʻ toshi jinslaridan dekorativ yoʻlaklar uchun gʻishlar ishlab chiqarish yoʻlga qoʻyilmoqda. Zaruriy texnologiyalar ishchi guruh hamkorligida ishlab chiqilgan grafik asosida oʻz vaqtida oʻrnatilib, yangi mahsulot ishlab chiqarishga shay holga keltirilgan. Ishchi guruh a’zolari toshlarni kesib tayyor mahsulot holatiga keltirishda ekonometrik modellashtirishdan foydalanish ishlab chiqarish sarf-xarajatlarni kamaytirishga olib kelishini ta’kidlab oʻtdilar. Bunda ekonometrika boʻyicha yetuk mutaxassis, “Iqtisodiyot” kafedrasi katta oʻqituvchisi Z.S. Nurov bilan tegishli kalkulyatsiyalarni amalga oshirishga kelishib olindi. “Ozodbek Universal Servis” MChJ faoliyati ham kengayib bormoqda. Ishchi guruh a’zolari va tadbirkor Gʻayrat Ahmedov korxona ishlab chiqarish binolarining qurilishi davrida hududiy bozorlardag talab va taklifdan kelib chiqqan holda amalga oshirilishi mumkin boʻlgan loyihalar boʻyicha maslahatlashishgan edi. Ayni paytda korxonada kichik tikuvchilik atelyesi, MDF eshik-derazalar tayyorlash va mebelsozlik ustaxonasi, bino tomida esa issiqxona faoliyati yoʻlga qoʻyilgan. Tadbirkor Gʻ.Ahmedov ushbu korxonada bir necha oʻn yangi ish oʻrni yaratgani tahsinga loyiq. Turizm fakulteti mamlakat iqtisodiy taraqqiyoti uchun muhim oʻrin tutuvchi bunday korxonalar bilan konsalting xizmalari koʻrsatish va bitiruvchilarni ishga joylashtirish boʻyicha hamkorligini davom ettiradi.
