Yangi 2019 yil arafasida viloyatimizning turli hududlarida bayram tadbirlari o‘tkazildi. Shunday tantanalardan biri otaxon dargoh – Buxoro davlat universitetida ham ko‘tarinki ruhda tashkil etildi. Musiqa kechasini mazmunli o‘tkazishda Pedagogika fakulteti dekani, psixologiya fanlari nomzodi, dotsent E.Muxtorov, Musiqa ta’limi kafedrasi mudiri, pedagogika fanlari nomzodi dotsent B.Madrimov, kafedra dotsenti Sh.Norova, O‘zbekiston bastakorlar uyushmasi a’zosi A.Xidirov, katta o‘qituvchi S.Gulovlar jonbozlik ko‘rsatishdi.“Yangi yil” deb nomlangan bu tadbirni universitet rektori, texnika fanlari doktori, professor A.A.To‘laganov tabrik nutqi bilan ochib berdi. Mazkur kechada Musiqa ta’limi kafedrasi professor-o‘qituvchilari, ta’lim yo‘nalishining iqtidorli talabalari ishtirok etishdi. Tadbirni musiqa ta’limi yo‘nalishi xor jamoasi S.Murodov dirijyorligida “Mening vatanim” kantatasining 1-qismini ijro etish bilan boshlab berishdi. “Tanovar” qo‘shig‘i Maftuna Sa’dullaeva, “Dugoh” maqomidan dugoh suvoriysi va ufori kafedraning professor-o‘qituvchilari tomonidan mahorat bilan ijro etildi. Ta’kidlash kerakki, dastur SHarq va G‘arb ohanglari bilan uyg‘unligida tuzilganligi bilan ko‘pchilikka manzur bo‘ldi. Qolaversa, kafedra dotsenti Sh.Norovaning “Hamroz”, 2-bosqich talabasi M.Nayimovaning estrada yo‘nalishidagi “Tamannozi” qo‘shiqlari ishtirokchilar qalbini o‘ziga rom etdi. Fakultetning doirachilar guruhi ham o‘z iqtidorlarini namoyish etishdi. Shu bilan birga M.Davronova, M.Xudoyorov, S.Hamroeva, S.Izbullaev singari iqtidorli talabalar kuylagan zamonaviy qo‘shiqlar kechaga o‘zgacha ruh baxsh etdi.Umuman olganda, universitetning Musiqa kafedrasi jamoasi va shu ta’lim yo‘nalishi talabalari ishtirokida tashkil etilgan bayram tadbiri qatnashchilarda iliq taassurotlar uyg‘otdi. Mazkur tadbir bir qator yosh iste’dod egalarini ham kashf etdi. Ma’rifat RajabovaBuxDU O‘zbek adabiyoti kafedrasi dotsenti, f.f.n.
