Buxoro davlat universiteti Kun chiqar mamlakatidan mehmonlarni kutmoqda. Ular qadim va navqiron Buxoroning 90 yoshga yaqinlashib qolgan oliygohi bilan samimiyat va mehr to‘la rishtalarni bog‘lash niyatida sharif shahrimizga tashrif buyurishmoqda. 21-noyabr kuni Buxoro davlat universitetida “BuxDU-Vakayama turizm ta’limi va tadqiqotlar markazi” tashkil etiladi.Buxoro davlat universiteti bilan Yaponiyaning Vakayama universiteti o‘rtasidagi do‘stlik rishtalari joriy yilning 16-aprel kuni imzolangan hamkorlik shartnomasi asosida keng quloch yoymoqda.Vakayama universiteti Turizm fakulteti o‘z bakalavriat dasturlari uchun Butunjahon turizm tashkiloti UNWTOning TedQual sertifikatini qo‘lga kiritgan bo‘lib, turizm yo‘nalishida bunday sertifikatga ega bo‘lgan birinchi va yagona yapon universitetidir. Fakultet huzurida "Turizm tadqiqotlari markazi" faoliyat ko‘rsatadi. Ayni paytgacha mazkur universitetdan BuxDUga bir necha marotaba professor-o‘qituvchilar ilmiy ma’ruzalar o‘qish uchun tashrif buyurishgan.Mavjud ilmiy va ta’lim sohasidagi aloqalarni kuchaytirish maqsadida hamda respublikamizda oliy ta’lim sohasida olib borilayotgan islohotlarga mos ravishda, ikkala tomon "BuxDU-Vakayama turizm ta’limi va tadqiqotlari markazi" tashkil qilish borasida kelishib olishgandi.Markazning asosiy vazifalari o‘zaro hamkorlikda turizm sohasida tadqiqotlar olib borish bilan bir qatorda yangi o‘quv adabiyotlari tayyorlash, ilmiy-uslubiy yo‘nalishlarda qo‘shma loyihalar, bakalavriat va magistraturada qo‘shma o‘quv dasturlarini amalga oshirishdir. O‘zR Vazirlar Mahkamasi huzuridagi "El-yurt umidi" jamg‘armasi hamda O‘zbek-yapon markazining Buxoro filiali mazkur markaz faoliyatini qo‘llab-quvvatlashlarini ma’lum qilgan holda, hamkorlik kelishuvini imzolash niyatini bildirganlar.Markaz ixtiyoriga BuxDU 2-binosi 4-qavatidagi 3 ta xona hamda koridor ajratilgan. 1-xona zamonaviy texnika jihozlari bilan ta’minlangan bo‘lib, maxsus darslarni o‘tishga mo‘ljallangan. 2-xona uchrashuvlar, seminarlar, davra suhbatlari o‘tkazish imkoniyatlari mavjud. 3-xonada tadqiqotchilar faoliyati uchun sharoitlar yaratilgan. Barcha xonalar Internet tarmog‘iga ulangan bo‘lib koridorda o‘zbek-yapon markazi Buxoro filiali tomonidan yapon madaniyati va ta’limi haqida ko‘rgazmali materiallar joylashtirilgan.O‘zbek-yapon markazi Buxoro filialining ko‘magi yapon tili kurslarini tashkil etish ko‘rinishida bo‘lsa, "El-yurt umidi" jamg‘armasi Yaponiyaning etakchi OTMlaridan professor-o‘qituvchilarni taklif qilish hamda BuxDU vakillarining Vakayama va boshqa etakchi yapon universitetlariga yuborilishida amaliy yordam ko‘rsatadi. Markaz faoliyatining dastlabki bosqichida Vakayama universitetidan tashrif buyurgan tadqiqotchi Takuya Fujii bilan birgalikda ingliz tilida "Barqaror turizm" darsligini tayyorlash rejalashtirilgan. Mazkur fan kelgusi o‘quv yilidan boshlab, BuxDUda yapon va o‘zbek mutaxassislar tomonidan "Turizm" bakalavriat ta’lim yo‘nalishlari uchun o‘qitiladi.Kelgusi bosqichlarda yana 10 ga yaqin darslik va qo‘llanmalar hamkorlikda tayyorlanishi, BuxDU va Vakayama universiteti "Turizm" bakalavriat va magistratura ta’lim yo‘nalishlari o‘quv dasturlari asosida yagona dastur ishlab chiqilishi, 2019-2020 o‘quv yilidan boshlab, ushbu dastur asosida talabalar qabul qilinishi rejalashtirilgan. Mazkur masalalar 2019-yilning mart oyida BuxDU delegatsiyasining Yaponiyaga tashrifi doirasida yakuniga yetkaziladi. Mannon OtaboyBuxDU matbuot kotibi
