Buxoro davlat universitetida xodimlar o‘rtasida axborot xavfsizligi va kiberxavfsizlik madaniyatini oshirish maqsadida targ‘ibot-tushuntirish tadbiri tashkil etildi.
Tadbir davomida universitetning Raqamli ta’lim texnologiyalari departamenti AXT bo‘yicha mas’ul xodimi R.N. Salimov ma’ruza qilib, axborot xavfsizligining ahamiyati, zamonaviy kiberxavfsizlik tahdidlari, axborotni himoya qilish usullari hamda tahdidlarda inson omilining o‘rni haqida batafsil ma’lumot berdi. Shuningdek, universitetda axborot xavfsizligini ta’minlash borasida amalga oshirilayotgan chora-tadbirlar haqida ham to‘xtalib o‘tildi.
Ma’ruza jarayonida internet va ijtimoiy tarmoqlardan xavfsiz foydalanish, fishing xabarlari, zararli havolalar va noma’lum fayllardan ehtiyot bo‘lish, shuningdek bank kartalaridagi mablag‘larni himoya qilishning oddiy va samarali usullari yuzasidan amaliy tavsiyalar berildi.
Bundan tashqari, “1xBet”, “Mostbet”, “Linebet” kabi tavakkalchilikka asoslangan o‘yinlarning inson ongiga va ijtimoiy hayotiga salbiy ta’siri haqida ham tushuntirishlar berildi. Tadbir davomida kompyuter va mobil qurilmalarda yuqori darajadagi xavfsizlikni ta’minlash, murakkab va ishonchli parollardan foydalanish zarurligi alohida ta’kidlandi.
Mazkur tadbir xodimlar o‘rtasida axborot xavfsizligi madaniyatini oshirish, internet va raqamli texnologiyalardan xavfsiz foydalanish ko‘nikmalarini shakllantirishga xizmat qildi.
