1. Ta’lim jarayonlari tamoyillari.
Universitetda ta’lim jarayonlarini tashkil etishda talabalar manfaatlari asosiy tamoyil sifatida e’tirof etiladi. Bu yondashuv, avvalo, talabani passiv bilim oluvchidan faol o‘quv jarayonining ishtirokchisiga aylantirishga qaratilgan. Shuningdek, har bir talabaning individual qobiliyatlari va ehtiyojlarini inobatga olish, mustaqil hamda tanqidiy fikrlashni shakllantirish va rag‘batlantirish ushbu yondashuvning muhim jihatlari sirasiga kiradi. Ta’lim metodlarining moslashuvchanligi esa talabaga bilim va ko‘nikmalarni chuqur o‘zlashtirish imkonini beradi.
Mazkur tamoyillar kafedralar tomonidan ishlab chiqilgan metodik qo‘llanmalar, shuningdek, o‘qituvchilarning amaliy faoliyati orqali amaliyotga joriy etiladi va doimiy takomillashtirib boriladi.
2. O‘qitish metodlari.
Ta’lim dasturi doirasida talabalarning bilim va ko‘nikmalarini samarali shakllantirish maqsadida turli zamonaviy va interaktiv o‘qitish metodlaridan keng foydalaniladi. Jumladan, muammoga asoslangan o‘rganish (Problem-Based Learning), loyiha va jamoaviy ishlanmalar, simulyatsiya va holat tahlillari (case studies) kabi faol o‘qitish usullari qo‘llaniladi. Shuningdek, amaliy mashg‘ulotlar, stajirovkalar hamda dala tadqiqotlari orqali nazariy bilimlarning amaliyot bilan integratsiyasi ta'minlanadi.
Ta’lim jarayonida aralash o‘qitish (blended learning) yondashuvi ham qo‘llaniladi, bunda raqamli ta’lim platformalari — xususan, Moodle, Uniwork va Hemis kabi tizimlardan foydalaniladi. Barcha dars shakllarida o‘qituvchilar har bir talabaning faol ishtirokini ta’minlashga intiladi, bu esa mustaqil fikrlash va jamoaviy ishlash ko‘nikmalarini rivojlantirishga xizmat qiladi.
3. Talabalar fikrlarini o’rganish
O‘quv jarayonini takomillashtirishda talabalar fikri muhim manba sifatida qaraladi va u muntazam ravishda o‘rganib boriladi. Har semestr yakunida talabalar orasida so‘rovnomalar o‘tkaziladi, bunda har bir fan va o‘qituvchining faoliyati alohida baholanadi. Bundan tashqari, fokus-guruhlar va ochiq muloqotlar tashkil etilib, talabalarning fikrlari tahlil qilinadi.
So‘rovnoma natijalari asosida o‘qituvchilarga individual tavsiyalar beriladi hamda o‘quv jarayonini takomillashtirish bo‘yicha tegishli chora-tadbirlar belgilanadi. Universitet rahbariyati va kafedralar talaba mulohazalarini faol ravishda inobatga oladi, bu esa ta’lim sifati va talabaga yo‘naltirilgan yondashuvni doimiy ravishda rivojlantirishga xizmat qiladi.
4. Talabalarni baholash jarayonlari
Talabalarni baholash tizimi shaffoflik, izchillik va moslashuvchanlik tamoyillariga asoslangan. Baholash jarayoni formativ va summativ (yakuniy) komponentlarni o‘z ichiga oladi. Formativ baholash dars jarayonida amalga oshiriladi va unga oraliq nazoratlar, mini-testlar hamda savol-javob shaklidagi faoliyatlar kiradi. Yakuniy baholash esa semestr oxirida o‘tkaziladigan yakuniy imtihonlar yoki kurs ishlari (loyihalari) himoyasi orqali amalga oshiriladi.
Baholash talabaning o‘quv natijalari bilan bevosita bog‘langan bo‘lib, baholash mezonlari va talablari talabalarga oldindan e’lon qilinadi. Bu yondashuv baholash jarayonining adolatli va prognoz qilinadigan bo‘lishini ta'minlaydi. Shuningdek, talabalar baholash natijalari yuzasidan apellyatsiya berish huquqiga ega bo‘lib, bu tartib universitetning ichki reglament hujjatlarida belgilab qo‘yilgan.
5. Talabalar bilan individual ishlash jarayonlari
Universitetda ta’lim jarayonida barcha talabalarning individual ehtiyojlarini hisobga olgan holda, ularni qo‘llab-quvvatlash va rivojlantirishga qaratilgan tizimli yondashuv mavjud. Iqtidorli talabalar bilan ishlash uchun ilmiy bo‘lim faoliyat yuritadi, bu bo‘lim ular uchun qo‘shimcha imkoniyatlar yaratadi va turli tanlov hamda loyihalarda ishtirokini rag‘batlantiradi.
O‘qituvchilar dars jarayonida talabalarining turli qobiliyat darajalarini inobatga olib, individual yondashuv asosida maslahatlar beradi hamda qo‘shimcha o‘quv materiallarini taqdim etadi.
Shuningdek, nogironligi bor talabalar uchun maxsus yondashuvlar ishlab chiqilgan bo‘lib, ularning o‘qish imkoniyatlarini kengaytiruvchi imtiyozli shartlar taqdim etiladi.
Bundan tashqari, universitetda qo‘llab-quvvatlovchi xizmatlar (psixolog xizmati, registrator ofisi, tyutor, kurator va tarbiyachilar) mavjud bo‘lib, ular akademik yordam, psixologik maslahatlar va boshqa zarur ko‘makni ko‘rsatadi. Bu tizim talabalarning inklyuziv va qulay ta’lim muhitida ta’lim olishiga xizmat qiladi.
