Korrupsiyaning oldini olish va unga qarshi kurashish tizimini yanada takomillashtirishga qaratilgan Prezident Farmonining qabul qilinishi mamlakatimizda ochiqlik, shaffoflik va qonun ustuvorligini ta’minlashga yo‘naltirilgan izchil islohotlarning mantiqiy davomi hisoblanadi. Mazkur Farmon korrupsiyaga qarshi kurashishda jazolash choralaridan ko‘ra, komplaens-nazorat va preventiv mexanizmlarga asoslangan tizimli yondashuvni ustuvor etib belgilaydi.
Buxoro davlat universitetining Korrupsiyaga qarshi kurashish “Komplaens-nazorat” tizimini boshqarish bo‘limi tomonidan pedagog-xodimlarga korrupsiya xavfini kamaytirishga qaratilgan preventiv choralar mazmuni tushuntirildi. Jumladan, korrupsiyaning oldini olishda aniq ichki qoidalarni belgilash, manfaatlar to‘qnashuviga yo‘l qo‘ymaslik, qarorlar va baholash jarayonlarining ochiqligini ta’minlash, xodimlarni muntazam xabardor qilish hamda korrupsion holatlar haqida xabar berish mexanizmlarini yaratish muhimligi ta’kidlandi.
Shuningdek, 2026-yil 1-iyuldan boshlab Korrupsiyaga qarshi Milliy sertifikatlashtirish menejment tizimi joriy etilishi ta’lim jarayonida halollik va shaffoflik tamoyillarini mustahkamlashi, korrupsiyaviy xavflarni tizimli boshqarish imkonini berishi qayd etildi.
Bundan tashqari, normativ-huquqiy hujjatlarni korrupsiyaga qarshi ekspertizadan o‘tkazish, “korrupsiyaning oldini olish klasteri”ni joriy etish hamda jamoatchilikni jarayonga faol jalb qilish komplaens-nazorat tizimining samaradorligini oshirishi ta’kidlandi.
