Buxoro davlat universitetida 2025-2026-o‘quv yili namunaviy o‘quv rejasi va malaka talablarida belgilangan vazifalar ijrosini ta’minlash, xususan, magistratura mutaxassisliklari 2-kurs talabalarining ilmiy amaliyot (stajirovka) jarayonlarini yuqori saviyada tashkil etish maqsadida kengaytirilgan konferensiya bo‘lib o‘tdi.
Tadbirda universitetning O‘quv ishlari bo‘yicha prorektori R.G‘. Jumayev, Korrupsiyaga qarshi kurashish “Komplaens-nazorat” tizimini boshqarish bo‘limi boshlig‘i Yorqin Quliyev, Magistratura bo‘limi boshlig‘i A.A. To‘rayev hamda fakultet mas’ullari va magistrantlar ishtirok etishdi.
Muloqot davomida barcha 2-kurs magistrantlari uchun 15 haftalik ilmiy amaliyotning mazmun-mohiyati tushuntirildi. O‘quv ishlari bo‘yicha prorektor R.G‘. Jumayev amaliyot davrida magistrlik dissertatsiyasi ustida ishlash bilan birga, kafedra professor-o‘qituvchilarining darslarini tahlil qilish va kamida bitta ochiq dars o‘tib berish orqali pedagogik mahoratni shakllantirish muhimligini ta’kidladi.
Konferensiya doirasida “Komplaens-nazorat” bo‘limi boshlig‘i Yorqin Quliyev so‘zga chiqib, ilmiy faoliyatda korrupsion holatlarning oldini olish, ilmiy ishlarni tayyorlashda akademik halollik tamoyillariga qat’iy rioya qilish hamda jarayonlarning shaffofligini ta’minlash yuzasidan magistrantlarga profilaktik tushuntirishlar berdi.
Magistratura bo‘limi boshlig‘i A.A. To‘rayev har bir magistrantning individual ish rejasini ishlab chiqish, MD ishi bo‘yicha tadqiqot usullarini to‘g‘ri qo‘llash hamda dissertatsiyalarni o‘z vaqtida yakunlash bo‘yicha metodik yo‘riqnomalar berdi. Shuningdek, amaliyot davrida magistrantlarning faoliyati bo‘lim tomonidan haftalik monitoring qilib borilishi qayd etildi.
