O‘zbekiston Respublikasi Prezidentining 2025-yil 30-dekabrdagi PF-270-son Farmoni ijrosini ta’minlash hamda oliygohda shaffoflik va akademik halollik muhitini yanada mustahkamlash maqsadida Fizika-matematika va axborot texnologiyalari fakulteti professor-o‘qituvchilari ishtirokida seminar-trening tashkil etildi.
Muloqot davomida korrupsiyaga qarshi kurashishning preventiv mexanizmlari, xususan, manfaatlar to‘qnashuviga yo‘l qo‘ymaslik hamda qarorlar qabul qilish va talabalar bilimini baholash jarayonlarida ochiqlikni ta’minlash masalalari atroflicha tahlil qilindi. Ishtirokchilarga korrupsion xavflarning oldini olishda ichki nazorat tizimining o‘rni va noqonuniy holatlar haqida xabar berish tartiblari yuzasidan batafsil metodik tushuntirishlar berildi.
Tadbirda universitetning “Odob-axloq kodeksi” hamda ichki tartib-qoidalariga qat’iy rioya etish — pedagogik jamoaning asosiy ma’naviy va huquqiy mas’uliyati ekanligi alohida ta’kidlandi. Akademik etika mezonlariga amal qilish nafaqat korrupsiyaning oldini olish, balki ta’lim sifatini oshirish va oliygohning nufuzini yuksaltirishning bosh omili sifatida e’tirof etildi. Buxoro davlat universitetida korrupsiyaga nisbatan murosasiz munosabatni shakllantirishga qaratilgan ushbu tizimli tadbirlar barcha fakultetlarda davom ettirilmoqda.
