Filologiya fakulteti O‘zbek tilshunosligi va jurnalistika kafedrasida yig‘ilish o‘tkazildi. Yig‘ilishni O‘zbek tilshunosligi va jurnalistika kafedrasi mudiri f.f.d., professor D.Z.Rajabov kirish so‘zi bilan ochib berdi va mavzu doirasida ma’ruzasi tinglandi:
O‘zbek tilshunosligi va jurnalistika kafedrasi mudiri D.Z.Rajabov Prezidentimiz Shavkat Mirziyoyev fikrlari bilan so‘z boshladi.
“Korrupsiya bilan hech qachon maqsadimizga erisha olmaymiz”
( Shavkat Mirziyoyev)
Korrupsiya bu — jamiyatni turli yo‘llar bilan iskanjaga oladigan dahshatli illatdir. Mazkur illat demokratiya va huquq ustuvorligi asoslariga putur yetkazadi, inson huquqlari buzilishiga olib keladi, bozorlar faoliyatiga to‘sqinlik qiladi, hayot sifatini yomonlashtiradi va odamlar xavfsizligiga tahdid soladigan uyushgan jinoyatchilik, terrorizm va boshqa hodisalar ildiz otib, gullashi uchun sharoit yaratib beradi. Ta’kidlab o‘tish o‘rinliki, ushbu zararli hodisa katta va kichik, badavlat va kambag‘al bo‘lishidan qat’iy nazar, barcha mamlakatlarda uchraydi. Ushbu zararli illatni bartaraf etish bo‘yicha jahon hamjamiyati tomonidan bir qator samarali ishlar amalga oshirilayotgan bo‘lsa-da, hanuzgacha u bartaraf etilmayapti. Ayni paytda mamlakatimizda korrupsiyaga qarshi kurashishning barcha huquqiy asoslari yaratilgan. Bu borada har birimizdan hushyorlik va mas’uliyatlilik talab etiladi.
Kun tartibidagi masala bo‘yicha f.f.d., professor M.Abuzalovaning ham mulohazalari tinglandi:
Korrupsiya ko‘plab davlatlarning jinoyat va ma’muriy qonunchiligi bilan huquqqa qarshi harakat sifatida ta’qib qilinadi. Korrupsiyaning tarixiy o‘zaklari juda qadimga borib taqalib, bu hol qabilada ma’lum mavqega ega bo‘lish uchun qabila sardorlariga sovg‘alar berish odatidan kelib chiqqan deb taxmin qilinadi. O‘sha davrlarda bu normal holat sifatida qabul qilingan. Biroq, davlat apparatining murakkablashuvi va markaziylashuvi korrupsiyaning davlat rivojlanishiga katta to‘siq ekanligini ko‘rsatdi. Korrupsiya jamiyat hayoti uchun tahdid soluvchi salbiy omil ekanini bilamiz. Shu sababli, davlatimiz tomonidan korrupsiyaga qarshi kurashish va uning oldini olishga jiddiy choralar koʻrilmoqda.
Shuningdek, ushbu mavzu yuzasidan f.f.d., professor G.Astanova ham o‘z fikrlarini bildirdi:
Korrupsiya har qanday davlat va jamiyatning barcha sohalari rivojlanishiga jiddiy putur yetkazadi, taraqqiyotni sekinlashtiradi, davlatni ich-ichidan yemirib boradi, xalqni xonavayron etadi, huquq va manfaatlar buzilishiga sabab bo‘ladi. Bugungi kunda butun jahon miqyosida ushbu jinoyatga qarshi kurashish eng dolzarb masalalardan biriga aylangan.
Har qanday ko‘rinishdagi korrupsiyaning sodir etilishida, ularning ko‘payishida va o‘z vaqtida barham berilmasligiga o‘zimizning befarqligimiz, loqaydligimiz sabab bo‘lib kelmoqda. Har bir fuqaro korrupsiya jinoyatlariga guvoh bo‘lganida bunday holat haqida huquqni muhofaza qiluvchi organlarga qo‘rqmasdan xabar berishi lozim. Korrupsiyaga oid huquqbuzarliklar to‘g‘risida axborot berayotgan shaxslarning davlat himoyasida bo‘lishi kafolatlangan hamda bu to‘g‘risida axborot berayotgan shaxslarni ta’qib etish qonunga muvofiq javobgarlikka sabab bo‘lishi belgilangan.
Ma’naviy-ma’rifiy ishlar bo‘yicha kafedra mas’uli f.f.f.d(PhD) N.Adizova tomonidan filologiya fakulteti 6.1UZB-22 guruh talabalariga ham “Korrupsiyadan xoli jamiyat sari” mavzusida ochiq muloqot tashkil etildi. Guruh talabalari mavzu doirasida o‘z fikr-mulohazalarini bildirishdi, o‘zlarini qiziqtirgan savollarga tegishli javoblarni olishdi.
