Odamlar nega samimiy sevgini, quvonchni his qilmay, ishdan. hayotdan bezishadi. Borgan sari kishilik hayoti tundlashib bormoqda desak xato bo‘lmaydi.. Masalan, buyumlar odamlar bilan samimiy munosabatlardan ko‘ra qimmatroq va muhimroq bo‘lib bormoqda. Yagona, haqiqiy muhabbat haqidagi gap-so‘zlar tobora erish tuyulib, hatto kulgini keltiradi. Nega toza hissiyotlar o‘tmaslashib borishini 1958 yili nemis psixoanalitiki Erix Fromm tushuntirishga harakat qilgan. U buning 5ta sababini keltirgan.Umid qilamizki, quyidagi so‘zlar kishilarning atrofdagi olamga bo‘lgan munosabatini yaxshi tomonga o‘zgartirish uchun turtki bo‘ladi. 1. Moddiy narsalar va boylik yig‘ishga intilish – hayot mazmuniga aylanib qoldiDoim to‘kin hayotda yashash istagi odamzodni to‘g‘ri yo‘ldan ozdirdi. Agar bugungi kunda odamlardan jannatni tasvirlab ber, deb so‘ralsa, u hoynahoy chek-chegarasiz do‘kon, uning turli-tuman mahsulotlari va ularni sotib olishga yetarli pul haqida gapirib bersa kerak. 2. Odamlar o‘z ishlarini yaxshi ko‘rishmaydiKo‘p hollarda odam o‘zi umuman qiziqmagan ishi bilan shug‘ullanadi. Xuddi qopqonga tushib qolgandek, asosiy quvvatini o‘ziga aloqasi bo‘lmagan, o‘zi yoqtirmagan ishga sarflaydi. Masalan, sotuvchilar tarqatilishi lozim bo‘lgan bema‘ni mahsulotni xaridorga hojati bo‘lmasa ham va buning uchun uni yomon ko‘rishsa ham sotishga urinadi. 3. Bozor iqtisodiyoti shaxsiy hayotni ham egallab olganShuning uchun bir qarashda hayotimiz bozorda mahsulot almashinishga o‘xshab ketadi. Odamlarni boshqarish bilan shug‘ullanadiganlar ma‘lum ma‘noda o‘z vijdonini sotishga majbur bo‘ladi. Va ularning insoniy qadri bozorda ularga to‘lanadigan narx bilan o‘lchanadi. Ularga bo‘lgan ehtiyoj so‘nsa, to‘lmagan ko‘ngillari bilan yolg‘iz qolishadi.4. Sevgi-muhabbat noyob va kamyob bo‘lib qoldiBiz o‘zimizcha tez-tez oshiq bo‘lamiz, osongina yolg‘on sevgi tasavvurlariga berilamizu, aslida haqiqiy, chuqur tuyg‘ularni his etmaymiz. Chunki biz moddiyat bilan haddan ziyod bog‘liqmiz va ishimiz, pullar va maqsadga erishish vositalari haqida judayam qayg‘uramiz. Zamonaviy jamiyat faoliyatini muvaffaqiyat bilan yuritish maqsadida biz o‘ta bilimli, aqlli odamlar sinfini tashkil etdik, biroq ularning ichki olami nihoyatda xarob ahvolda. 5. Ko‘pchilik uchun tenglik bu – bir xillik.Agar odam boshqalardan farqli bo‘lsa o‘zini to‘laqonli deb hisoblay olmaydi. Aslida tenglikning mohiyati bir inson boshqa insonning maqsadga erishish vositasi bo‘lishi mumkin emasligini nazarda tutadi. Bu dunyoda har bir inson o‘zgacha olam. Xo‘sh, bulardan qanday xulosa qilish mumkin? Eng muhimi, bizning baxt haqidagi tasavvurlarimiz cheksiz-chegarasiz iste‘molda emas, balki avvalo haqiqiy, g‘ayratli, ijodiy aloqalar, o‘ziga, tabiatga va odamlarga e‘tibor va iliq munosabatdan iborat bo‘lmog‘i lozim. Baxtni esa faqat his etish mumkin. Shu sababli avvalo siz uchun baxt nimadan iborat ekanligiga aniqlik kiritish lozim. Shu yerda yana bir maslahat: baxt haqida o‘ylayotganda xolis bo‘lishga harakat qiling. “Hammaning sog‘-salomat bo‘lishi, barcha insonlar orzulariga yetishi bu men uchun baxtdir”,- degan balandparvoz gaplardan uzoqroq bo‘lganingiz ma‘qul. Chunki har bir insonning baxt mezoni o‘zgacha. Alyuatta baxt g‘am-alamni ham inkor etmaydi. Asosiysi, inson qayg‘ura oldimi, demak u yashayapti. Dilbar Hamdamova, psixolog
