#Talabalar_ijodidan
#Nasr
#Hayotiy_hikoya
Mehr
USTOZ naqadar ulug' va tabarruk zot. Bu so'zni eshitganda esa bizga ta'lim, tarbiya bergan aziz ustozlarimiz ko'z oldimizda gavdalanadi.
Yosh edim. Maktabda o'qib yurgan paytlarimdayoq universitetda o'qishni, xuddi ustozlarim, qolaversa, onajonim singari men ham ustoz bo'lishni orzu qilardim. Onajonim har 1-oktabr "Ustozlar va murabbiylar bayrami"da qo'llarida guldastalar bilan uyimizga kirib kelardilar. Onamni ko'rib menda ham qandaydir faxr tuyg'usi alanga olar edi. Ich-ichimdan g'ururlanardim. Onamdan universitetda o'qigan paytlaridagi hayotlari haqida so'raganimda menga talabalik davrlaridagi qiziq-qiziq voqealarni aytib kuldirardilar. Onamga judayam havas qilardim (hozirgi kunda ham judayam havas qilaman). Onam talaba bo'lganlarida bitta aspirant qizni yaxshi ko'rishlarini aytardilar. Onam bakalavr talabasi bo'lganlarida, u kishi aspiranturada o'qir ekanlar. "Ismlarini aytishganda shu kishini bir bora ko'rishni orzu qilardim, nafaqat men, balki kursdoshlarim ham", - deb haligacha aytadilar onam.
Shu-shu orzularimga erisha boshladim. Dastlab o'zim xohlagan universitetga kirib talabalik baxtiga erishdim, bu hayotimdagi eng katta yutug'im edi. Universitetga kelib o'qiy boshlagan dastlabki kunlarimdanoq, juda ko'p ustozlar bilan tanishdim. Taqdirni qarangki, ustozga bo'lgan mehr meni ham shu fakultetda shu kishi bilan uchrashtirdi, onamda bo'lgan mehr menda ham takrorlandi , ismlarini bilmagan holda ustozga nisbatan mehr paydo bo'lgan edi, shunchalik samimiy, shunchalik mehribon, shunchalik oqko'ngil, yuragimga shunchalik yaqin bo'lgandilarki, buni so'z bilan ta'riflash qiyin... Shu-shu hayotimda yana bitta ustoz paydo bo'ldi. Bizga darsga kira boshlaganlarida esa bu kishiga nisbatan yanada mehrim orta boshladi. Mendan boshqa yana bitta kursdosh dugonam u kishi bilan judayam yaqin edi. Doimo ustoz bilan suhbatlar qurar, telegram, telefon orqali ham gaplashib turardilar. Darsga kirganlarida ustoz menda yana-da katta taassurot qoldirdilar. Men ham ustozga yaqinlasha boshladim.Kursdoshim ustoz haqida gap boshlaganlarida negadir men ustozimni kursdoshimdan qizg'onardim. Faqat mening ustozim, menga yaqin inson bo'lib qolishlarini xohlardim, negadir. Lekin ustoz uchun hamma talaba ham bir xil ekanligini bilsamda, ustozimni yana-yana qizg'onaverardim. MEHR shunday narsa ekanki, ustozga telegram orqali yozsam, yoki telefon qilganimda ko'tarmasalar judayam xafa bo'lardim (Yig'lagan paytlarim ham bo'lgan ba'zida). Ustoz javob qaytara olmaganlarida, balki vaqtlari bo'lmagan, yoki nimadir sabab bilan javob qaytarolmaganlarini tushunishni istamasdan xafa bo'lganman.
O'sha men orzu qilgan, ideal ona, ideal ustoz sifatida ko'z oldimda gavdalangan, meni o'zining so'z sehriga mahliyo qilgan ustozim bu filologiya fanlari doktori, professor O'rayeva Darmonoy Saidahmedovna edilar. Mana shu ustozday bilimli, salohiyatli, ayniqsa, ustozning o'zlaridan bilim olib, xuddi o'zlaridek ustoz bo'lish har bir talabaning orzusidir.
✍️Dilnurabonu Vayisova
BuxDU Filologiya fakulteti, filologiya va tillarni o'qitish: o'zbek tili ta'lim yo'nalishi 6-3UZB-20-guruh talabasi
