O‘zbekiston Respublikasi Prezidenti Sh.Mirziyoyev ta‘kidlaganlaridek, muhtaram faxriylarimizning urushdan keyingi og‘ir tiklanish yillarida qanday buyuk xizmat qilganlarini xalqimiz aslo unutmaydi. Ularning mardlik va matonati, mehnat jasorati bugungi va kelgusi avlod uchun hamisha ibrat namunasi bo‘lib qoladi. Darhaqiqat, ulug‘ maqsadlarni ko‘zlab, olg‘a intilayotgan yoshlarimiz uchun ota-bobolarimiz hayot yo‘li, ularning o‘gitu nasihati hamisha asqotgan. Har qanday ezgu amalga qo‘l urishdan oldin albatta yoshi ulug‘ keksalardan duo olish xalqimiz uchun doimiy odat bo‘lib kelgan. Qolaversa, "Qarisi bor uyning parisi bor" deb, bejiz aytishmagan. Ular bor joyda xayru baraka, fayzu tarovat borligi ham shundan. Yaqinda viloyat "Xotira markazi"da bo‘lib o‘tgan "O‘tmish ajdodlar xotirasini yodga olish — yoshlarning burchi" mavzuidagi uch avlod uchrashuvida keksalarimiz haqida ana shunday iliq fikrlar bildirildi. Uchrashuvda so‘z olgan katta va o‘rta avlod vakillaridan — filologiya fanlari nomzodlari Samad Azimov, Tavakkal Choriyev, qishloq xo‘jaligi fanlari nomzodi Muzaffar Mahmudov, professor Hafiz Botirov, mehnat faxriysi Nurulla Narzullayevlar markazga tashrif buyurgan talaba-yoshlarga o‘tmish xotiralaridan so‘zlab berib, ularni a‘lo baholarda o‘qishga, ilm egallashga, xushxulq, axloq-odobli bo‘lishga da‘vat etdilar.Manba: Buxoronoma.uz
