2017 yil 16-fevral kuni Buxoro davlat universiteti Fizika-matematika fakulteti talabalari joylashgan 1-son talabalar turar joyi binosida “Matematika” kafedrasi ma’naviy-ma’rifiy ishlar rejasiga asosan “Ma’naviyat kuni” o’tkazildi. Tadbirni “Matematika” kafedrasi professor-o’qituvchilari tashkil etib o’tkazdilar.Reja asosida dastlab TTJ 1-binosida istiqomat qiladigan Fizika-matematika talabalarining yashash sharoitlari bilan tanishildi hamda ularning TTJ fayesida joylashgan kompyuterlardan foydalanish ahvoli tahlil qilindi. Kompyuterlar internet tarmog’iga ulangan bo’lib, talabalar asosan www.buxdu.uz, www.ziyonet.uz, www.google.uz kabi web sahifalardan foydalanishlari aniqlandi. Talabalarga kompyuterlardan unumli foydalanish bo’yicha tegishli ko’rsatmalar berildi hamda taqiqlangan web sahifalar va ularning zararli oqibatlari haqida tushuntirish ishlari olib borildi. So’ngra 1-binoning 3-qavatida joylashgan Ma’naviyat xonasida kitob mutolaasi va kitobxonlik madaniyatini oshirish maqsadida talabalar bilan “Kitob bilan muloqot” mavzusida davra suhbati bo’lib o’tdi. Dastlab badiiy, ma’rifiy, ilmiy-ommabop, tarbiyaviy, yoshlarning intelektual salohiyatini oshirish hamda targ’ibot qilish bo’yicha hukumatimiz tomonidan olib borilayotgan islohotlar to’g’risida ma’lumotlar berildi. Davra suhbati davomida “Boburnoma” tarixiy ilmiy asari, Said Ahmadning “Jimjitlik” romani va O’tkir Hoshimovning “Daftar hoshiyasidagi bitiklar” asarlari bo’yicha bahs munozaralar olib borildi.“Ma’naviyat kuni” Matematika kafedrasi dotsenti T.H. Rasulov, kafedra katta o’qituvchilari Sh.B. Merajova, Z.N. Hamdamov, S.S. Xudayarov, kafedra o’qituvchilari Z.R. Bozorov, E.B. Dilmurodovlar tomonidan Matematika va Fizika ta’lim yo’nalishlari 3-bosqich talabalari ishtirokida tayyorlangan “Tafakkur” intelektual tadbiri bilan davom ettirildi. Bunda Matematika va Fizika ta’lim yo’nalishi 3-bosqich talabalaridan tashkil topgan jamoalar 4 ta shart bo’yicha bellashdilar. Alisher Navoiy va Zahriddin Muhammad Boburlar haqida keltirilgan ma’lumotlar hamda ular ijodidan keltirilgan namunalar barchaga manzur bo’ldi. Tadbirda tezkor savol-javob, xotira mashqi va jumboqli savol kabi shartlar bo’yicha olib borilgan bahs-munozaralar talabalarning har tomonlama etuk mutaxassis bo’lishlariga xizmat qiluvchi ilmiy, siyosiy, dunyoviy yangiliklar va qiziqarli ma’lumotlarga boy bo’ldi. Pedagogika fakulteti musiqiy ta’lim yo’nalishi 4-bosqich talabasi Davronov To’xtasin Orifjon o’g’lining qo’shiqlarni jonli ijro qilishi tadbirga o’zgacha kayfiyat bag’ishladi. Tadbir hammada birdek yaxshi taasurot qoldirdi. Kelgusida e’tibor qaratilishi lozim bo’lgan vazifalar belgilab olindi. Fizika-matematika fakulteti Matematika kafedrasi
