2018-yilning 16-may kuni Buxoro davlat universitetiga Germaniyaning O`zbekistondagi favqulodda va muxtor elchisi janob Gunter Leo Overfeld tashrif buyurdi. Buxoro Davlat Universiteti rektori A.A.To`laganov, elchi janoblari va filologiya fakulteti, nemis va fransuz tillari kafedrasining bir guruh professor-o`qituvchilari hamda talabalari bilan davra suhbati bo`lib o`tdi. U o`z nutqida O`zbekistonda ta’lim sohasida olib borilayotgan islohotlarga katta e’tibor qaratilganligi, jumladan, O`zbekiston Respublikasi Prezidentining 2017-yil 20-apreldagi PQ-2909-sonli “Oliy ta’lim tizimini yanada rivojlantirish chora-tadbirlari to`g`risida”gi Qarori asosida oliy ta’lim tizimida jadal o`zgarishlar amalga oshirilayotganini ta’kidlab o`tdi. Shuningdek chet tillariga alohida e’tibor berilayotganligi, yoshlarga katta imkoniyatlar yaratilayotganini ta’kidladi.
Elchi janoblari davra suhbati davomida nemis tili ta’lim yo`nalishi professor-o`qituvchilari hamda talabalari tomonidan tayyorlangan chiqishlarni katta qiziqish bilan kuzatdi. O`z navbatida ular qo`lga kiritgan yutuqlari hamda chet tillarini o`rganish uchun katta imkoniyatlar yaratilganligini so`zlab berishdi. Bundan tashqari, kafedra o`qituvchilari tomonidan yozilayotgan “Nemischa-o`zbekcha, o`zbekcha-nemischa lug’at” ham muhokama qilindi. Ushbu lug`at O`zbekiston oliy ta’lim muassasalarida yaratilayotgan birinchi 80 mingdan ortiq so`zlardan iborat lug`at bo`ladi. Hozirgi davrda uni yakunlash bosqichi ketayotganligi haqida fikrlar almashinildi. Davra suhbati qizg`in savol-javob va muhokama tarzida davom etdi. Elchi janoblari talabalarni qiziqtirgan barcha savollarga javob berdi va talabalarning chiqishlari juda katta taassurot qoldirganini yashirmadi. Shuningdek, elchi janoblari Buxoro davlat universitetining muzeyiga tashrif buyurib, universitetga asos solinishi va uning bugungacha bo`lgan tarixi bilan tanishdi.
Germaniya elchixonasi nemis tili kutubxonasini hamda nemis tili lug’atini chop etishda ko`maklashishga va’da berdi.
