Universitet xalqaro hamkorlik bo‘yicha prorektori A.T. Jo‘rayev Qozog‘istonning Nursulton shahriga xizmat safari davomida L.Gumilyov nomidagi Yevrosiyo milliy universitetiga tashrif buyurdi. Mazkur universitet 1996-yilda tashkil etilgan bo‘lib, ayni paytda Qozog‘iston OTMlari reytingida 2-o‘rinda, QS jahon reytingida 418-o‘rinda, shu jumladan QS yosh universitetlar (tashkil topganiga 50 yildan oshmagan) reytingida 51-60 o‘rinda turadi, Times reytingida esa 1001+ guruhidan o‘rin egallagan.
Ayni paytda YMUda 18 ming nafarga yaqin talabalar tahsil olib, xorijiy talabalar jahonning 25 mamlakatidan kelishgan. Prorektor A. Jo‘rayevning YMU xalqaro aloqalar va innovatsiyalar bo‘yicha prorektori Akbota Joldasbekova bilan uchrashuvida o‘zaro hamkorlik masalalari, shu jumladan xalqaro reytinglarga kirishda universitetlarimizning bir-birini qo‘llab-quvvatlashi, strategiyalar va ish rejalarini ishlab chiqishda hamkorlik qilish bo‘yicha kelishib olindi. Shuningdek, kelasi o‘quv yilidan boshlab qo‘shma o‘quv dasturlarini tashkil qilish bo‘yicha dastlabki kelishuvga erishildi.
Prorektor A. Jo‘rayev YMU infrastrukturasi bilan tanishib chiqish chog‘ida "Turkiy yozuv tarixi muzeyi"da ham bo‘lib, faxriy mehmonlar kitobida BuxDU nomidan xotira so‘zlarini yozib qoldirdi.
Tashrif davomida YMUda faoliyat ko‘rsatuvchi "G-Global" muloqot platformasi faoliyati bilan ham tanishildi. "G-Global" muloqot platformasi internet orqali 150 mamlakatdan 30 ming nafardan ortiq mutaxassisni birlashtiruvchi onlayn platforma bo‘lib, unda yosh iqtidorlar, olimlar, mutaxassislar, tadbirkorlar jahon global muammolari hamda ularni hal qilish bo‘yicha fikr almashib borishadi. "G-Global" tashabbusini 14 nafar Nobel mukofoti sohiblari ham qo‘llab-quvvatlashgan.
YMU "G-Global" markazi rahbari Punit Gaur bilan uchrashuvda BuxDUning ham ushbu harakatga qo‘sgilishi borasida kelishuvga erishildi. Ushbu tashabbuslar doirasida talabalar almashinuvini yo‘lga qo‘yish rejalashtirildi.
Prorektor A.Jo‘rayevning YMU bilan tanishuvi jarayonida esda qolarli yana bir yoqimli holat ro‘y berdi. Bundan bir necha yillar oldin BuxDUda italyan tili o‘qituvchisi sifatida faoliyat ko‘rsatgan Marko Ferrentino ayni paytda YMUda ish olib borayotgan ekan. Marko Ferrentino O‘zbekiston va Buxoro har doim uning qalbida ekanligini, BuxDUni doimo yaxshi xotiralar bilan esga olishini aytib, universitetimiz jamoasiga o‘z salomini yetkazib qo‘yishni so‘radi.
