O’zbekiston Respublikasi Vazirlar Mahkamasining 2017 yil 22 noyabrdagi 936-sonli qaroriga ko’ra barcha viloyatlardagi oliygohlar tuzilmasida Qatag’on qurbonlari xotirasi muzeyining tashkil etilishi belgilab qo’yilgan edi. Buxoro davlat universitetida ham ushbu qaror ijrosi bo’yicha qator tashkiliy va ilmiy izlanishlar olib borilishi natijasida 2018 yil 18 mayda universitet tuzilmasida Qatag’on qurbonlari xotirasi muzeyining tantanali ochilish marosimi bo’lib o’tdi. Tadbirda O’zbekiston Respublikasi Vazirlar Mahkamasi huzuridagi Qatag’on qurbonlari muzeyi direktori B.V.Hasanov, viloyat hokimligi vakillari, “Nuroniy”, “Mahalla” xayriya jamg’armalari, professor-o’qituvchilar, talabalar va qatag’on bo’lganlarning oila-a’zolari ishtirok etdilar. Shuni alohida ta’kidlab o’tmoq joizki, universitet tuzilmasidagi ushbu muzey Respublikamizda birinchilar qatorida tashkil etildi. Muzey 3 ta zaldan iborat bo’lib, 1865 yildan hozirgi kunga qadar bo’lgan davrni qamrab oladi. Muzey ekspozisiyasidan XIX asrga oid osori-atiqalar, qimmatli arxiv hujjatlari, foto va kino hujjatlar o’rin olgan. Mustaqillik zalida “Islom Karimov buxoroliklar xotirasida” deb nom olgan ekspozisiya ham joy olgan bo’lib, ushbu foto va hujjatli materiallar O’zbekiston Respublikasi Prezidenti huzuridagi O’zbekiston Respublikasi Birinchi Prezidenti Islom Karimov nomidagi ilmiy-ma’rifiy yodgorlik majmuasi bilan hamkorlikda tayyorlandi.
