Buxoro davlat universitetida xalqaro miqyosda tan olingan olimlar ishtirokida muhim ilmiy uchrashuv bo‘lib o‘tdi. Tadbirda BuxDU rektori Obidjon Xamidov boshchiligidagi universitet jamoasi bilan bir qatorda xorijiy yetakchi professorlar ishtirok etdi.
Uchrashuvda A.A. Zakhidov — Texas universiteti (University of Texas) professori, Suklyun Hong — ikki o‘lchamli materiallar va ularning elektron hamda optoelektronik ilovalardagi geterotuzilmalarini nazariy o‘rganish yo‘nalishi bo‘yicha yetakchi olim, Annie Ng — Nazarbayev universiteti professori hamda V. Pavlenko — Al-Farabi nomidagi Qozog‘iston Milliy universiteti professori qatnashdi.
Muloqot davomida 2D materiallar, ularning geterotuzilmalari, elektronika va optoelektronika sohalarida qo‘llash imkoniyatlari bo‘yicha olib borilayotgan zamonaviy ilmiy tadqiqotlar muhokama qilindi. Shuningdek, Buxoro davlat universitetida ushbu yo‘nalishlarda qo‘shma ilmiy loyihalarni amalga oshirish, xalqaro grantlarda ishtirok etish, ilmiy maqolalarni nufuzli jurnallarda chop etish, yosh tadqiqotchilar va doktorantlar uchun ilmiy rahbarlik va tajriba almashinuvi masalalari yuzasidan kelishuvlarga erishildi.
Uchrashuv yakunida tomonlar kelgusida uzoq muddatli va barqaror ilmiy hamkorlikni yo‘lga qo‘yish, ilm-fan va innovatsiyalar sohasida o‘zaro manfaatli tashabbuslarni amalga oshirishga tayyor ekanliklarini bildirdilar.
Mazkur uchrashuv Buxoro davlat universitetining xalqaro ilmiy hamkorlik doirasini kengaytirish, zamonaviy ilmiy yo‘nalishlarni ta’lim va tadqiqot jarayoniga tatbiq etish yo‘lidagi muhim qadam bo‘ldi.
