Buxoro davlat universiteti rektori Obidjon Xamidov xizmat safarining navbatdagi kunida Xitoyning nufuzli oliy ta’lim maskanlaridan biri - Nanking audit universitetining ikkita yirik kampusida bo‘ldi. Tashrif davomida universitetning akademik salohiyati, o‘quv jarayonini raqamlashtirish darajasi, ilmiy infratuzilmasi hamda xalqaro hamkorlik bo‘yicha yo‘lga qo‘yilgan tizimlar bilan batafsil tanishildi.
Uchrashuv doirasida rektorga universitetning zamonaviy auditoriyalari, kutubxona majmuasi, ilmiy-tadqiqot laboratoriyalari, talabalar shaharchasi va xalqaro talabalarga yaratilgan sharoitlar haqida batafsil ma’lumotlar berildi. Nanking audit universiteti vakillari ikki tomonlama hamkorlikni kengaytirish, qo‘shma ta’lim dasturlari tashkil etish, o‘qituvchi va talaba almashinuvi yo‘nalishlarini rivojlantirishga tayyor ekanliklarini bildirdilar.
Tashrifning muhim qismida BuxDU rektori Fransiya hamda Marokash davlatlaridan kelgan xorijiy talabalar bilan uchrashdi. Talabalar o‘zlarining o‘qish jarayoni, kampus hayotidagi imkoniyatlar hamda xalqaro muhitda ta’lim olish tajribalari haqida fikr almashdilar. Uchrashuv iliq va samimiy ruhda o‘tdi, talabalar o‘z taklif va mulohazalarini bildirib, ikki universitet o‘rtasidagi hamkorlikning ahamiyatini e’tirof etdilar.
Mazkur tashrif Buxoro davlat universitetining xalqaro maydondagi hamkorlik aloqalarini yanada mustahkamlash, ta’lim jarayoniga ilg‘or xorijiy tajribalarni joriy etish, qo‘shma dasturlarni ko‘paytirish va talabalarga kengroq xalqaro imkoniyatlar yaratish yo‘lidagi muhim qadamlardan biri bo‘lib xizmat qiladi.
