Buxoro davlat universiteti xalqaro hamkorlik bo‘yicha prorektori Abror Jo‘rayev Turkiyaning Anadolu universitetidan tashrif buyurgan delegatsiya a’zolarini qabul qildi. Delegatsiya tarkibidan Anadolu universiteti bosh kotibi (rektor o‘rinbosari) Ecevit Öksüz, masofaviy ta’lim va xalqaro hamkorlik bo‘yicha direktori Salih Gümüş hamda professor Birol Mercan o‘rin oldi. Uchrashuv davomida ikki universitet o‘rtasida masofaviy ta’lim platformalarini takomillashtirish, sun’iy intellektdan foydalanish va o‘quv jarayoniga ilg‘or texnologiyalarni joriy etish kabi yo‘nalishlarda hamkorlik masalalari muhokama qilindi.
Anadolu universiteti 1958-yilda tashkil etilgan bo‘lib, 1982-yildan buyon masofaviy ta’lim sohasida dunyoda yetakchi o‘rinni egallab kelmoqda. Bugungi kunda 1 millionga yaqin talabaning masofaviy ta’lim olishi uni dunyodagi eng yirik universitetlardan biriga aylantiradi. Uchrashuv davomida BuxDU masofaviy ta’lim dasturlarida Anadolu universitetining texnik imkoniyatlaridan foydalanish, mavjud resurslar asosida darslarni BuxDU talabalari uchun yo‘lga qo‘yish, shuningdek, onlayn turk tili kurslarini Buxoro yoshlariga imtiyozli shaklda taklif etish bo‘yicha kelishuvlarga erishildi.
Shuningdek, Buxoro davlat universiteti va Anadolu universiteti o‘rtasida hamkorlik to‘g‘risida memorandum imzolandi. Ushbu memorandum doirasida BuxDU talabalari endilikda Anadolu universitetida ta’lim olish imkoniyatiga ega bo‘ladilar. Hamkorlikning kengayishi ikki oliygoh o‘rtasidagi ilmiy, ta’limiy va texnologik aloqalarni yanada mustahkamlashga xizmat qiladi.
