Assalomu alaykum, qadrli yurtdoshlar!
Aziz ustozlar va shijoatli talabalar!
Millatimiz ruhi, milliy g‘ururimiz – o‘zbek tiliga davlat tili maqomi berilganining o‘ttiz besh yilligi, «21 oktabr – O‘zbek tili bayrami» munosabati bilan universitetimiz professor-o‘qituvchilarini, xodimlarini, talaba-yoshlarimizni va barcha yurtdoshlarimizni chin qalbimdan tabriklayman.
Har bir millatning o`zligini anglatuvchi xush kalomi uning tilida bayon etiladi. Til – millat qiyofasining bir bo‘lagi. Xalqning madaniyati, urf-odati, uning turmush tarzi, tarixidir. Til — davlat timsoli, mulki. Tilni asrash, rivojlantirish – millatning yuksalishi demak.Til boyligini asrash shu xalqning kelajagini asrash demakdir. O`z tilini anglagan inson o`z eliga e'tiborli bo`ladi. Hazrat Alisher Navoiy aytganlaridek, «Ko`ngul maxzanining qulfi til va ul maxzanning kalitin so`z bil».
Ona allasi bilan qon-qonimizga singib ketgan til boyligimizni jon qadar e’zozlamoq har bir o`zbekning farzandlik burchidir.
Bugungi kunda jonajon O‘zbekistonimiz har sohada dunyoning tez suratlar bilan rivojlanayotgan mamlakatlari reytinglarida yuqori o‘rinlarni qayd etmoqda. Milliy til esa mamlakat taraqqiyoti, jamiyat rivojida katta o‘rin egallaydi. Har bir xalq, elatni milliy tilsiz tasavvur etib bo‘lmaydi. Chunki milliy tilda millat ruhi, uning boy tarixiy qiyofasi, milliy qadriyatlar, sobit e’tiqodlar aks etgan bo‘ladi. Shu boisdan ona tilini asrab-avaylash, uning mavqeyini yanada mustahkamlash, rivojlantirish mamlakat taraqqiyotning muhim omili sifatida qaraladi.
Zero, Ona tilimiz – millatimizning ruhi, tariximizning ko‘zgusi, milliy ma’naviyatimizning asosidir. Shunday ekan, ona tilimizni e’zozlash, munosib hurmat hamda ehtirom ko‘rsatish barchamizning muqaddas burchimiz va majburiyatimizdir!
Aziz vatandoshlar!
Fursatdan foydalanib, yana bir bor barchangizni ulug‘ bayram bilan samimiy tabriklayman!
BuxDU rektori, iqtisodiyot fanlari doktori, professor Xamidov Obidjon Xafizovich
