2024-yil 15-oktabr kuni Yaponiya - O’zbekiston Ipak yo’li fondining 16 kishilik delegatsiyasi Buxoro davlat universitetiga tashrif buyurdi. Delegatsiyaga qishloq xo’jaligi va mintaqaviy rivojlanish bo’yicha fond raisi Minagawa Yoshitsugu janoblari boshchiligidagi delegatsiya tarkibini Japan Tobacco Inc., Japan Tourism Agency, ITO EN, Ltd., Calbee, Inc., Trust Engineering Partners Co., Ltd, Universal Sports Marketing Co., Ltd., Nippon Travel Agency Co., Ltd. Kabi Yaponiyaning ko’zga ko’ringan 14 yirik korxona vakillari hamda Yaponiya - O’zbekiston Ipak yo’li fondining O’zbekistondagi vakili Baxriddinov Mansur va O’zbekiston jahon tillari universiteti professori Ibragimova Malikalar tashkil qildi.
Uchrashuv davomida delegatsiya a’zolari O’zbekiston Respublikasining ijtimoiy-iqtisodiy rivojlanishi uchun tashqi savdo, qishloq xo’jaligi, sog’liqni saqlash, sport, madaniyat va ta’lim kabi sohalarga ustuvorlik berish kerakligini ta’kidlab o’tishdi. Delegatsiya vakillari universitetga tashrifdan oldin “Buxoro Agroklaster” Mchjda bo’lib, Buxoro viloyatidagi qishloq xo’jaligi sohasining yuqori investitsion potensiali mavjudligini ta’kidlab o’tishdi. Bundan tashqari, Yaponiyalik mehmonlar O’zbekistonda yapon tilini o’rganayotgan ko’p sonli talabalarga yuqori baho berib, bu yoshlar O’zbekistondan turib Yaponiya korxonalariga masofaviy ishlash imkoniyati borligini bildirdilar.
Delegatsiya tarkibini tashkil qiluvchi Universal Sports Marketing Co., Ltd., vakillari bilan Buxoro shahrining nufuzli xalqaro sport musobaqalarini o’tkazish shahri sifatida dunyoga tanitish, Trust Engineering Partners Co., Ltd korxonasi tomonidan esa Buxoro viloyati zamonaviy texnologiyalarga asoslangan krevetka yetishtirishni yo’lga qo’yish loyihasining rejasi tanishtirildi.
Shundan so’ng, delegatsiya vakillari O’zbekiston – Yaponiya faoliyati bilan yaqindan tanishishdi va shu bilan Buxoro davlat universitetiga rejalashtirilgan tashrif o’z nihoyasiga yetdi.
