Buxoro davlat universitetida Fransiya oliy taʼlim muassasalari bilan yaqin hamkorlik aloqalari o‘rnatilgan. Shuningdek, turizm va mehmondo‘stlik yo‘nalishida jahonda 11-o‘rinda, Fransiyada esa 1-o‘rinda turuvchi Vatel mehmonxona va va turizm biznes maktabining Markaziy Osiyodagi yagona filiali ham aynan Buxoro davlat universitetida faoliyat ko‘rsatib kelmoqda.
Universitetning Fransiya bilan aloqalari faqat taʼlim dasturlari bilan cheklanib qolmagan.
Ayni paytda mamlakatimizda futzal bo‘yicha jahon chempionati bo‘lib o‘tayotganidan, o‘yinlarning bir qismi Buxoroda tashkil qilinganidan xabaringiz bor.
Fransiyaning katta futbol bo‘yicha terma jamoasi 1998 va 2018- yillarda jahon, 1984 va 2000- yillarda Yevropa chempionligini qo‘lga kiritgan, shuningdek 1984-yilda Olimpiadada oltin medalni qo‘lga kiritgan.
Futzalda esa Fransiya jamoasining hozircha bosh yutug‘i aynan O‘zbekistonda o‘tkazilayotgan jahon chempionatiga yo‘llanma olganligidir. Bugun Fransiya futzal terma jamoasi o‘z tarixida jahon chempionatlaridagi birinchi o‘yinini Buxoro universal sport majmuasida o‘tkazadi.
Tarixiy o‘yin oldidan universitetimizga Fransiya futbol federatsiyasi rahbari Filipp Diallo boshchiligidagi delegatsiya tashrif buyurdi. Delegatsiya tarkibidan federatsiya vakillari, futbolchilarning yaqinlari va ishqibozlar o‘rin olishgan. Mehmonlar bilan o‘tkazilgan uchrashuvda ko‘plab ishqibozlar ishtirok etishdi. F.Diallo tarixiy o‘yinda jamoani Buxoro davlat universiteti talabalari va professor-o‘qituvchilarini qo‘llab-quvvatlashlariga umid qilishini, terma jamoa bundan xabardor va mamnun ekanligini maʼlum qildi.
Xalqaro hamkorlik bo‘yicha prorektor A.Jo‘rayev ham mehmonlarni qutlab, bugungi o‘yinda Fransiya jamoasiga omad tiladi.
Barchangizni Universal sport majmuasida bo‘lib o‘tayotgan o‘yinlarga taklif etamiz!
