12-sentabr kuni Oliy ta’lim, fan va innovatsiyalar vazirining o‘rinbosari Otabek Mahkamov Buxoro davlat universitetida bo‘lib, yangi 2024/2025-o‘quv yili boshlanganligi munosabati bilan talabalar turar joyida istiqomat qilayotgan talaba-yoshlar bilan suhbat o'tkazdi. Jumladan, talabalar turar joyi holati, oshxona, maʼnaviyat xonalarida talabalar uchun yaratilgan sharoitlar koʻzdan kechirildi.
Ma'lumot o'rnida shuni ta`kidlash joizki, 2024/2025-o‘quv yilida Buxoro davlat universitetida 8 ta 2867 o‘rinli talabalar turar joyi faoliyati yo‘lga qo‘yilgan. Universitet talabalar turar joylarining 6 ta binosiga 2008 nafar talaba-qizlar va 2 ta binosiga 859 nafar talaba-yigitlarni joylashtirish belgilangan. 4 ta ustuvorlik bo‘yicha talabalardan arizalar qabul qilingan. Bunda 1-ustivorlik I- va II-guruh nogironlari, Ijtimoiy himoya yagona reyestri, ayollar daftari, temir daftar va Yoshlar daftari ro‘yxatida bo‘lganlar, 2-ustuvorlik - doimiy yashash manzili boshqa hudud, ya’ni viloyatlardan kelgan talabalar, 3-ustuvorlik -kunduzgi, bakalavr talabalari bo‘lib, 4-ustuvorlik - umumiy sirtqi va kechki ta’limda tahsil olayotgan va yotoqxona xizmatiga talabgor talabalardan iborat. Joriy o‘quv yilining 10 sentabriga qadar My.gov.uz billing tizimi orqali 2504 ta ariza kelib tushgan va 2501 ta ariza uchun yo‘llanma berilgan. Hozirgacha 2112 nafar talaba yashash xonalariga joylashishgan. Ma’lumot o‘rnida aytish mumkinki, tabiiy fanlar va agrobiotexnologiyalar fakultetida tahsil olayotgan talabalarga Buxoro tuman Rabotiqalmoq MFY Yangiobod ko‘chasida qad rostlagan zamonaviy bino tez kunlarda foydalanishga topshiriladi.
Buxoro davlat universiteti Axborot xizmati
