Xabaringiz bor, Parij paralimpiya o‘yinlarining para dzyudo bo‘yicha erkaklar o‘rtasida J2 klassida -60 kg vazn toifasidagi bahslarda yurtimiz sharafini himoya qilgan buxorolik Sherzod Namozov oltin medal uchun kechgan final bahsida gruziyalik Zurab Zurabianni mag‘lub etib ikki karra Paralimpiya o‘yinlari g‘olibi degan sharafli nomga sazovor bo‘lgan edi.
Bugun ikki karra paralimpiya o‘yinlari chempioni Sherzod Nomozov o‘zi tug‘ilib o‘sgan Buxoroda tantanali kutib olindi. Shu munosabat bilan Buxoro davlat universitetida tadbir tashkil etildi. Unda viloyat hokimligi vakillari, murabbiylar, sportchilar hamda keng jamoatchilik vakillari ishtirok etdi.
Tadbirda so‘z olganlar yurtimiz bayrog‘ini jahon uzra baland ko‘targan matonatli va vatanparvar farzandni tarbiyalaganliklari uchun uning ota-onasi va murabbiylariga alohida minnatdorlik bildirishdi.
Shuningdek, chempion va uning yaqinlari ham so‘zga chiqib, Prezidentimizning sportga qaratayotgan e’tibori, Vatanimiz shuhratini nufuzli musobaqalarda keng tarannum etish uchun sportchilarga yaratayotgan sharoitlar uchun o‘z minnatdorliklarini bildirishdi.
