Joriy yilning 17-19-iyul kunlari Germaniyaning Laubusch shahrida Chemnitz texnologiya universiteti (Germaniya), Xarbin fan va texnologiya universiteti (Xitoy), Mo‘g‘uliston fan va texnologiya universiteti (Mo‘g‘uliston), Yevroosiyo milliy universiteti (Qozog‘iston) hamda Buxoro davlat universiteti (O‘zbekiston) hamkorligida “Kompyuter ilmlari va ta’lim texnologiyalari” mavzusida 13-xalqaro simpozium tashkil etildi.
Ushbu nufuzli xalqaro simpoziumda jahonning 30 dan ortiq mamlakatlaridan yetakchi olimlar ishtirok etishdi. Simpoziumda oliy ta’limda, xususan, muhandislik ta’limini o‘qitishda zamonaviy uslub va texnologiyalarni qo‘llashga oid muammolar hamda ularni bartaraf qilish bo‘yicha tadqiqot natijalari muhokama qilindi.
Simpoziumning tashkiliy qo‘mitasi xulosasiga ko‘ra navbatdagi 14-xalqaro simpozium 2025-yilda Mo‘g‘uliston fan va texnologiya universitetida, 2027-yilda esa Buxoro davlat universitetida o‘tkazilishi rejalashtirildi. Shuningdek, Muhammad al-Xorazmiy nomidagi Toshkent axborot texnologiyalari universiteti ham simpozium hamkorlari safiga qo‘shildi.
Simpozium natijalariga ko‘ra tanlangan maqolalar Scopus xalqaro ma’lumotlar bazasida indekslanuvchi “IEEE ISCSET 2024 Proceedings” to‘plamida nashr qilinishi ko‘zda tutilgan.
Xalqaro simpozium haqidagi batafsil ma’lumotlar bilan quyidagi havola orqali tanishish mumkin: https://www.iscset-conf.org/
