Ma’lumki, so‘nggi yillarda Muhtaram Prezidentimiz Shavkat Mirziyoyevning barcha sohalar singari yoshlarga oid davlat siyosati doirasida keng ko‘lamdagi amaliy islohotlar “Inson qadri” g‘oyasi ostida amalga oshirib kelinmoqda. Aytish o‘rinliki, Prezidentlikka kirishgan kunlarida ilk imzolangan Qonun ham, aynan “Yoshlarga oid davlat siyosati” to‘g‘risidagi (O‘RQ-406-son 14.09.2016) Qonun bo‘lgani fikrimizning yorqin dalildir.
Bugun yurtimiz aholisining 18 millionidan ortig‘i, viloyatimiz aholisining 52 foizi aynan yoshlar kontingentini tashkil etishi, viloyatimizdagi har bir yoshning sifatli ta’lim olishi, bo‘sh vaqtini mazmunli o‘tkazishi, bir necha tillarni o‘zlashtirib olishi, kasblarni, hunarlarni o‘rganishi uchun barcha sharoitlar mavjud. Shunga mos ravishda Buxoro yoshlari nafaqat yurtimizda balki dunyoning turli mintaqasida bilim va tafakkurda, sport, madaniyat, san’at va boshqa sohalarda ulkan natijalarni qo‘lga kiritayotgani barchani xursand qiladi.
Joriy yilni – “Yoshlar va biznesni qo‘llab-quvvatlash yili” deb e’lon qilinishi va belgilangan vazifalar doirasida minglab yoshlarni ulkan marralarni egallashi, o‘zining tadbirkorlik faoliyatini yo‘lga qo‘yishi, amaliy natijalarni qo‘lga kiritishiga zamin bo‘ldi.
Bugun guvohi bo‘lib kelyapmizki, Buxoro davlat universitetida ham talaba-yoshlar natijalari nafaqat viloyat darajasida balki Respublika miqyosida ham juda katta salmoqni tashkil etadi.
Yurtimiz rahbarining yoshlar bilan tizimli ishlash, ularni eshitish, ko‘maklashish va har tomonlama qo‘llab-quvvatlash borasidagi manzilli ko‘rsatmalari doirasida hududlardagi soha rahbarlarining yoshlar bilan uchrashuvlari, muloqot tizimi yaratildi. Ayniqsa, 30 iyun – Yoshlar kuni munosabati bilan yurtimizda iyun oyini yoshlar oyligi deb e’lon qilinishi, aksariyat rahbarlarning yoshlar bilan uchrashuvlari an’anasi bir necha yilda buyon davom etib kelmoqda.
Buxoro davlat universitetida bugun “Yangi O‘zbekiston yoshlari birlashaylik!” shiori ostida yoshlar oyligi doirasida o‘tkazilgan “Prokuror va yoshlar” uchrashuvi ham ushbu tadbirlarning amaliy jarayoni bo‘ldi.
Tashkil etilgan uchrashuvda Buxoro davlat universitetida tahsil olayotgan iqtidorli yoshlar (nomdor stipendiya sovrindorlari, Zulfiya nomidagi mukofot sovrindorlari, ilm- fan sohasida ulkan yutuqlarni qo‘lga kiritayotgan), yurisprudensiya ta’lim yo‘nalishi 1-va 2-bosqich talabalari, yoshlar yetakchilari, rahbar-xodimlar va professor-o‘qituvchilar ishtirok etishdi.
Tadbirni universitet rektori Obidjon Xamidov ochib, bugungi kunda oliygohda 10 ta fakultet, 39 ta kafedra, 85 ta bakalavriat yo‘nalishi va 42 ta magistratura mutaxassisligi mavjudligi hamda 21 676 nafar (bakalavriat kunduzgi 11 533 nafar, kechki 1 209 nafar sirtqi 8 134 nafar, masofaviy 209 nafar, magistratura 591 nafar, qo‘shma ta’lim dasturi bo‘yicha 223 nafar) talaba tahsil olishi haqida ma’lumot berdi. Talabalarning 3426 nafari grant, 18 250 nafari to‘lov kontrakt asosida tahsil olayotganini aytildi. Joriy o‘quv yilida universitetda 803 nafar professor-o‘qituvchilar shundan: 70 nafar fan doktori, 348 nafari fan nomzodi, ilmiy salohiyat 53 foizni tashkil etishi ta’kidlab o‘tildi. Shuningdek, BuxDUda 30 yoshgacha bo‘lgan yoshlar balansi shakllantirilgan bo‘lib, ular soni 17887 nafar bo‘lib, shundan 10279 nafari xotin-qizlar, 57,5% tashkil etishi ma’lum qilindi.
Viloyat prokurori, adliya katta maslahatchisi Ulug‘bek Xamdamov talaba-yoshlarga mamlakatimizda yoshlarga oid davlat siyosati doirasida Qonun, Farmon, qaror va barcha me’yoriy xujjatlar va keng ko‘lamli amaliy islohotlar mazmun mohiyatini aytib o‘tishdi. Bugungi kunda yoshlarni erishayotgan natijalari e’tirof etildi. Yoshlar o‘rtasida yuzaga kelayotgan ayrim ko‘ngilsiz holatlar ya’ni huquqbuzarlik, jinoyatchilik kabi illatlar va uning oqibatlari hayotiy misollar keltirib qoralandi.
Shundan so‘ng, talaba-yoshlarning prokuror va prokuratura tizimi bilan hamkorlik borasida, sifatli ta’lim olish, turli tanlovlar, muloqotlar, master klasslar, o‘quv amaliyotlar tashkil etish kabi qator masalalar ilgari surildi. Yoshlarni o‘z ta’lim yo‘nalishi bo‘yicha bilim va ko‘nikmalarini yanada oshirish maqsadida viloyat prokurori va bo‘lim prokurorlarining kunlik ish jarayonini anglash maqsadida “Prokurorning bir kuni” loyihasi doirasida prokuror bilan bir kun barcha jarayonlarda birga ishtirok etish taklifi ham yoshlar tomonidan ilgari surildi.
Shuningdek, uchrashuv davomida mamlakatimizda yoshlarga oid davlat siyosatini chuqur anglab, yaratib berilgan imkoniyatlardan unumli foydalangan holda 2023/2024-o‘uv yilida universitetdagi fanlarni a’lo baholarda o‘zlashtirib, tengdoshlariga namunali bilimi, xulqi, odobi, madaniyati bilan o‘rnak bo‘lib kelayotganligi uchun viloyat prokurori tomonidan tashakkurnoma topshirildi. Muloqot jarayonlarida faol qatnashgan yoshlarga kitoblar to‘plami sovg‘a tariqasida topshirildi.
Uchrashuvdan so‘ng viloyat prokurori yoshlarni sifatli ta’lim olishi uchun yaratilgan sharoitlar jumladan, o‘quv auditoriyalari, registrar ofis, sport zallari, talabalar turar joylari, kovorking markazi, Psixologik va sotsiologik tadqiqotlar markazi, yuridik klinika, ARM-kutubxona, robototexnika markazi faoliyati bilan yaqindan tanishdi.
BuxDU Matbuot xizmati
