2017 yil 2 may kuni Buxoro davlat universitetida katta ilmiy xodim-izlanuvchi va mustaqil izlanuvchilari bilan O’zbekiston Respublikasi Prezidentining 2017 yil 20 apreldagi “Oliy ta’lim tizimini yanada rivojlantirish chora-tadbirlari to’g’risida”gi 2909-sonli qarori ijrosini ta’minlash bo’yicha “2017-2021 yillarda Oliy ta’lim tizimini kompleks rivojlantirish dasturi” mavzusida hamda Oliy ta’lim tizimini kompleks rivojlantirish dasturining muhim tamoyillariga bag’ishlangan yig’ilishi bo’lib o’tdi. Unda ilmiy ishlar bo’yicha prorektor K.A.Samiyev, I va IPKTB boshlig’i G.T.Zaripov, universitetning 20 nafar katta ilmiy xodim-izlanuvchilar va tadqiqotchilar ishtirok etdi. Ilmiy ishlar bo’yicha prorektor K.A.Samiyev Prezident qarorining har bir bandi bo’yicha alohida to’xtalib, iqtidorli talabalar, yosh olimlar, katta ilmiy xodim-izlanuvchilar va mustaqil izlanuvchilar, professor-o’qituvchilar uchun yaratilayotgan imtiyozlar, ta’lim tizimidagi yangiliklar va o’zgarishlar haqida batafsil ma’lumot berdi. Xususan, professor o’qituvchilarning xorij davlatlarning nufuzli oliy o’quv yurtlarida malaka oshirishi, doktorantura PhD, stajirovka shuningdek pedagog kadrlar malakasini oshirish va qayta tayyorlashda chet ellik olimlarni taklif etishning ahamiyatli tomonlari, malakali, ilg’or tajribali professor o’qituvchilarni rag’batlantirish uchun rektor jamg’armasi tuzilganligi, shuningdek, qarordan ko’zlangan asosiy maqsad respublikamiz oliy ta’lim tizimida Garvard, Oksford darajasidagi ta’lim sistemasini yaratish kerakligi kabilar asoslab berildi. Umuman, “Oliy ta’lim tizimini yanada rivojlantirish chora-tadbirlari to’g’risida”gi qaror va undan ko’zlangan maqsad barcha katta ilmiy xodim-izlanuvchilar va mustaqil izlanuvchilarga teran anglatildi. Shu ma’noda ilmiy tadqiqotchilar mazkur qaror to’g’risidagi fikr-mulohaza hamda takliflarini bayon qildilar.
