3-oktabr kuni Buxoro davlat universitetiga Yevropa Ittifoqining O‘zbekistondagi elchisi Sharlot Adrian boshchiligidagi delegatsiyasi tashrif buyurdi. Elchi Sh.Adrianga Yevropa Ittifoqining O‘zbekistondagi delegatsiyasi siyosiy aloqalar bo‘yicha masʼuli Tomas Yue, YeI delegatsiyasining siyosat, matbuot va axborot bo‘limi boshlig‘i yordamchisi Nigina Aliyeva hamda O‘zbekiston Respublikasi Tashqi ishlar vazirligi Buxoro hududiy boshqarmasi birinchi kotibi A.Qurbonov hamrohlik qildi.
Elchi bilan uchrashuvda rektor O.Xamidov, xalqaro hamkorlik bo‘yicha prorektor A.Jo‘rayev hamda universitetning Yevropa Ittifoqi loyihalarida ishtirok etgan va etayotgan bir guruh o‘qituvchilar, shuningdek Buxoro davlat tibbiyot instituti va Buxoro davlat pedagogika instituti vakillari ishtirok etishdi.
Elchiga Yevropa Ittifoqi dasturlari doirasida BuxDU va BuxDTIda amalga oshirilgan loyihalar (TALENT, EPOCA, BioEcUz va boshq.), Yevropa mamlakatlari oliy taʼlim muassasalari bilan hamkorlik to‘g‘risida maʼlumot berildi. Taʼkidlab o‘tish joizki, Yevropa Ittifoqi tomonidan moliyalashtirilgan loyihalar soni bo‘yicha Buxoro davlat universiteti O‘zbekistondagi oliy taʼlim muassasalari o‘rtasida 2-o‘rinda turadi.
Elchi o‘z navbatida universitet faoliyati, xususan Yevropa Ittifoqi loyihalari bo‘yicha olib borilgan ishlar bilan tanishishdan mamnun ekanligini qayd etdi. Yevropa Ittifoqi O‘zbekistondagi taʼlim islohotlarini qo‘llab-quvvatlashda davom etishini, bunda biotexnologiyalar, qishloq xo‘jaligi, muhandislik sohalari ustuvolik kasb etishini aytib o‘tdi. Shuningdek, Buxoroga tashrifi davomida Yevropa Ittifoqi tomonidan moliyalashtirilgan boshqa loyihalarning ham bugungi kundagi holati bilan tanishish hamda Yevropa kinosi kunlarining ochilishida ishtirok etish uchun kelganligini maʼlum qildi.
Maʼlumot uchun: joriy yilning 3-5 oktabr kunlari shahrimizning “Buxoro” kinoteatrida Yevropa kinofestivali filmlari namoyishi bo‘lib o‘tadi. Kirish bepul.
