Bugun BuxDUda barchaning ko`zida quvonch, erta tongdan bayram kayfiyati, shukuh hukmron bo`ldi. Saranjom-sarishta universitetimizda bugungi shodiyonani birga nishonlash uchun karnay-surnay sadolari ostida uzoq-yaqindan mehmonlar tashrif buyurishdi.
Muassasa foyesida tinib-tinchimas talaba-yoshlar tomonidan yaratilgan ijodiy ishlar ko`rgazmasi tashkil etilgan bo`lsa, BuxDU professor-o'qituvchilari va mehmonlar o'rtasida sport musobaqalari ham o`tkazildi. BuxDU rektori Obidjon Xamidov hamda rahbariyat xodimlari, professor-o`qituvchilar stol tennisi, shaxmat, shashka o`yinlarini o`ynashdi.
BuxDU faollar yig`ingohida esa Buxoro davlat universiteti tashkil topgan kun munosabati bilan katta ma'rifiy tadbir o`tkazildi.
Tadbirda ushbu dargohda ta'lim olgan, talabalarga saboq bergan nuroniy ustozlar, uzoq-yaqindan kelgan mehmonlar, professor-o`qituvchilar va talaba-yoshlar ishtirok etishdi. Buxoroyi sharif tarannumi, shu betakror shahrimiz bag`ridagi bebaho javohir —BuxDU haqidagi ash'orlar bilan boshlangan tadbir faxr-va iftixor, shukronalik ruhini uyg`otdi.
—Buxoro davlat universiteti tashkil topilganiga rasman 93 yil to`lgan bo`lsa ham aslida uning ildizi asrlarga borib taqalashi, madrasalar shahri Buxoroyi sharifda o`z o`rniga ega bo`lgan ilm-ma'rifat maskani bo`lganini e'tirof etish joiz. Bu dargohda ko`plab rahbarlar, davlat va fan arboblari, davlat mukofotlariga sazovor olim va olimalarimiz, prezident stipendiatlari, nomdor stipendiyalar sohib va sohibalari, xorijda o`z bilimi va faoliyati bilan shuhrat qozonayotgan bir qator vatandoshlarimiz tahsil olishgan. Va eng muhimi, ularning barchasi el-yurt xizmatida o`z faoliyatlarini olib borishmoqda. Darvoqe, barchamiz yurtimiz ilm-faniga o‘z hissamizni qo`shayotganimiz, olim va olimalarni tayyorlayotganimiz, Buxoroyi sharif nomini yuksakka ko`tarayotganimiz bilan har qancha iftixor tuysak arziydi, — dedi BuxDU rektori Obidjon Xamidov tadbirni ochib berish asnosida.
Tadbir BuxDU San'atshunoslik fakulteti ustozlari hamda talabalari tomonidan ijro etilgan kuy-qo`shiq va raqslar ostida davom etdi. Buxoro davlat universitetining 93 yilligi munosabati bilan BuxDUga hamkor xorijiy davlatlar Oliy ta'lim muassasalari rektorlari yo`llagan video-tabriklar yig`ilganlar e'tiboriga havola etildi.
Ma'rifiy tadbirdan so`ng Buxoro davlat universitetining 93 yilligi munosabati bilan to`kin dasturxon yozildi. BuxDUdagi barcha uchun yozilgan bayram dasturxonini o`zbekning milliy taomi osh bezadi. Kuy-qo`shiq ostida, bir piyola choy ustida davom etgan tadbir barchaga xushkayfiyat ulashdi.
Shuningdek, bayram munosabati bilan BuxDU talaba-yoshlari o'rtasida gandbol, basketbol, futbol, voleybol sport musobaqalari, professor-o`qituvchilar o`rtasida voleybol sport musobaqasi o`tkazildi.
