BuxDUda Oliy ta’lim, fan va innovatsiyalar vazirligi, “UI GreenMetric” xalqaro reyting agentligi, Indoneziya universiteti hamda Buxoro davlat universiteti bilan hamkorlikda “O‘zbekiston oliy ta’lim muassasalari uchun birinchi “UI GreenMetric” jahon universitetlari reytingi milliy forumi” “GreenJamiyatning iqtisodiy transformatsiyasida ta’lim sifatining o‘rni” mavzusiga bag‘ishlangan xalqaro konferensiya bo`lib o`tdi.
Unda “UI GreenMetric” xalqaro reyting agentligi raisi o'rinbosari Dr. Nyoman Suwartha, “UI GreenMetric” xalqaro reyting agentligi eksperti prof. Ir. Gunawan Tjahjono, Buxoro davlat universiteti rektori Obidjon Xamidov, Toshkent davlat yuridik universiteti, Jizzax politexnika instituti, Toshkent davlat texnika universiteti, Toshkent davlat agrar universiteti ma'sul xodimlari, viloyat oliy ta`lim muassasalari rahbarlari hamda 20 dan ortiq xorijiy davlatlardan xalqaro ekspertlar, ta’lim sohasi yetakchilari ishtirok etishdi.
Iqtisodiy-ijtimoiy hayotning tobora globallashib borayotgan bugungi davrida, inson ongi aql bovar qilmas yuksak ilmiy natijalar erishdi. Shuning bilan birga, ilm-fan taraqqiyotiga erishgan sari, insoniyat barqaror rivojlanish tamoyillariga rioya qilishi zarurligi, bunda oliy ta’limning o‘rni juda muhim ekanligini anglab kelmoqdamiz.
O‘zbekiston Respublikasining strategik rivojlanish maqsadlaridan biri 2026-yilga kelib, jahonning 50 ta eng innovatsion davlatlari qatoridan o‘rin egallashdir. Innovatsion rivojlanish mamlakat iqtisodiy taraqqiyotining eng muhim omili ekanligi shubhasizdir. Demak, jamiyatimiz uchun ilmiy asoslangan takliflarni, innovatsion ishlanmalarni, loyihalarni ishlab chiqib, amaliyotga tatbiq qilar ekanmiz, bunda barqaror rivojlanish maqsadlarini har doim e’tiborga olishimiz zarur, —dedi BuxDU rektori Iqtisodiyot fanlari doktori, professor Obidjon Xamidov so`zga chiqish asnosida.
“UI GreenMetric” jahon universitetlari reytingi milliy forumi” doirasida BuxDU talabalarining ijodiy ishlaridan iborat ko`rgazma ham tashkil etildi. Tashrif buyurgan mehmonlar ushbu ijodiy ishlar bilan tanishishdi. San'at namunalarining yaratilish jarayoni bilan qiziqishdi. Xorijdan tashrif buyurgan mehmonlar o`zbek cholg`u asboblariga qiziqish bildirishdi.
Xalqaro hamkorlik bo`yicha prorektor Abror Jo`rayev BuxDU “ofis-registrator” markazi va faoliyati xususida so`zlab berdi.
