Har yilgidan farqli o`laroq, nainki BuxDU magistrantlari, balki iqtidorli talabalar, tayanch doktorantlar va doktorantlar, professor-o`qituvchilar qatorida boshqa oliy ta'lim muassasalari va maktab pedagoglari, Respublikamizning turli viloyatlaridan tezislarni qabul qilgan ushbu konferensiya 350 dan ortiq ilmiy ishlarni o`z ichiga qamrab oldi. Konferensiya doirasida, “Tafakkur va talqin” deb nomlangan to`plamda turli sohalarda, xususan, aniq va tabiiy fanlar, lingvistika, adabiyotshunoslik (o`zbek, rus, ingliz, fransuz, nemis), iqtisodiyot va turizm, pedagogika va psixologiya, amaliy san’at va san’atshunoslik kabi bir qancha yo`nalishlarda tezislar jamlandi.
– Bugungi ilmiy-amaliy konferensiya har galgidan takomillashgan, kundan-kunga rivoj topayotgan ilm-fanimiz tadqiqiga bag`ishlangan. Keltirilgan maqolalar yosh tadqiqotchilarning izlanishlarining ilk samarasi bo‘lib, bu natijalarni ommalashtirish, yosh tadqiqotchilarning ilmiy faoliyatlari yo‘nalishlari bo‘yicha hamkor korxonalar va o‘z sohasining yetuk olimlari bilan tanishishlariga imkoniyat yaratish lozim. Konferensiyani universitet ilmiy ishlar va innovatsiyalar bo‘yicha prorektori professor, Rasulov To'lqin Husenovich ochib berib, Kelajakda BuxDUning izlanuvchan talabalari orasidan o‘z ilmiy maktablariga ega bo‘lgan olimlar, nufuzli xalqaro oliy dargohlarga dars bera oladigan ustozlar, xalq xo‘jaligining fidoiy xodimlari, jamiyatimizga kerakli kadrlar yetishib chiqishiga ishonch bildirdi.
Anjumanda mehmon sifatida tashrif buyurgan Slovakiyaning Pavol Jozef Shafarik universiteti dotsenti, Martina Martausova “Film in the Classroom: Problems and challenges of using film in language learning processes” (Darslarda filmdan foydalanish: Til o’rganish jarayonida filmlardan foydalanish muammolari) mavzusida ma’ruza qilgan bo`lsa, Germaniyaning Gottingen universiteti professori Eva Ortmann “Magistratura talabalarining ilmiy ish yozish ko’nikmalarini oshirish: Germaniya oliy ta’lim muassasalari bilan hamkorlik” mavzusida o`z fikr-mulohazalarini bildirdi. Magistrantlar mehmonlarga soha doirasida o`zlarini qiziqtirgan savollariga javob olishdi. Shundan so'ng Buxoro tibbiyot instituti Xalqaro hamkorlik bo‘yicha prorektori f.-m.f.f.d., (PhD), dotsent Niyazov Laziz Nurxonovich “Oliy ta’lim tizimining xalqarolashuvi jarayonida magistraturaning o‘rni” mavzusidagi ma’ruzasi yig`ilganlarga iliq taassurot qoldirish barobarida kelgusi ishlarida va maqsadlarini rejalashtirishlarida motivatsiya bera oldi.
Anjumanda so'ngida so`zga chiqqan BuxDU magistratura bo’limi boshlig’i, f.-m.f.f.d., (PhD), dotsent Turayev Akmal Atayevich magistrantlarning sifat jihatdan o`sib borayotgani va bu borada qilinayotgan tadbirli ishlar xususida alohida to`xtaldi. So`z yakunida magistrantlarning ilmiy faoliyatlarida muvaffaqiyat tiladi, anjumanda faol ishtirok etgan professor-o'qituvchi va magistrlarga o'z minnatdorchiligini bildirdi.
