Amir Temur — o’zligimizni anglash, milliy an’ana va qadriyatlarimizni tiklash borasidagi ulug’vor ishlarda xalqimizga ma’naviy kuch bag’ishlab kelayotgan ulug’ siymolardan biridir.
Sohibqiron tavallud topgan kun mamlakatimizda har yili ko’tarinki ruhda keng nishonlanadi. Bu yil ham ulug’ sarkarda tavalludining 687 yilligi tadbirlari katta xursandchilik bilan o’tkazilmoqda. Sohibqiron Amir Temur tavalludining 687 yilligi munosabati bilan Buxoro davlat universitetida ma'naviy ma'rifiy tadbir bo`lib o`tdi.
"Sohibqiron Amir Temur - faxrimiz, g`ururimiz!" mavzusida o`tkazilgan tadbirni BuxDU rektori Obidjon Xamidov ochib berdilar. Oliy Majlis Qonunchilik palatasi deputati Qodir Jo'rayev yaqinda bo`lib o`tadigan referendum, O‘zbekiston Respublikasi Konstitusiyaviy qonuni loyihasining mohiyati xususida o`z-fikr mulohazalarini bildirdi. BuxDU Tarix va madaniy meros fakulteti professori Sulaymon Inoyatov, professor Shodmon Hayitov, dotsent Abdurayim Boltayevlar o`z ma'ruzalari bilan ishtirok etishdi.
Tadbir mobaynida "Temurnoma" kitobi taqdimoti ham bo`lib o`tdi. Shuningdek, Milliy gvardiyaning jasur o`g`lonlari chiqishlari, Amir Temurning buyuk bunyodkorlik va adolat bilan yuritgan siyosatini ochib beruvchi sahna ko`rinishlari yig`ilganlarga taqdim qilindi.
