Konstitutsiya har qanday davlatning asosiy qonunidir. U jamiyat uchun ishlashi, uning talab va ehtiyojlarini qondirishi kerak. Konstitutsiyaning mazmuni — mamlakatning davlat, ijtimoiy va siyosiy hayotining barcha asoslarini belgilashdan iborat. Boshqacha aytganda, u huquq tizimining asosi va poydevori bo‘lib, boshqa barcha qonunlar uning asosida quriladi. Lekin, shu bilan birga, Konstitutsiya qatʼiy, o‘zgarmas hujjat emas. Zamonaviy O‘zbekiston tarixida ilk marotaba xalqning o‘zi konstitutsiyaviy islohotlarda faol ishtirok etmoqda. Shu ma'noda Yangi Konstitutsiya tom maʼnoda Xalq Konstitutsiyasiga aylanib bormoqda.
So`nggi kunlarda faol o`tkazilayotgan turli-tuman tadbirlar qatorida ayni paytda Buxoro davlat universitetida ham "Konstitutsion islohotlardan kutilayotgan natijalar" mavzusidagi tadbir bo`lib o`tdi. Unda Inson huquqlari bo‘yicha O‘zbekiston Respublikasi Milliy markazi direktori birinchi o‘rinbosari, yuridik fanlari doktori, professor Mirzatillo Tillabayev, O‘zbekiston Respublikasi Huquqni muhofaza qilish Akademiyasi boshlig‘i o‘rinbosari, yuridik fanlari doktori, professor Muzaffarjon Mamasidiqov, O‘zbekiston Respublikasi Fanlar Akademiyasi Davlat va huquq instituti direktori, yuridik fanlari doktori, professor Murodjon Turg‘unov, Inson huquqlari bo‘yicha O‘zbekiston Respublikasi Milliy markazi bo‘lim boshlig‘i, yuridik fanlar nomzodi, dotsent Farhod Xayitboyevlar ham ishtirok etishdi.
