Buxoro davlat universitetida O‘zbekiston Respublikasi Oliy Majlisi Senati Raisining sobiq o‘rinbosari, Yuridik fanlari doktori, professor Rajabova Mavjuda Abdullayevna bilan uchrashuv bo`lib o`tdi.
Samimiy ruhdagi uchrashuvni BuxDU rektori Obidjon Xamidov tashrifdan mamnuniyat izhor etib, ochib berdi. Huquq sohasida ko‘zga ko‘ringan yetuk mutaxassis, taniqli olima, ko‘pgina huquqshunoslarning sevimli ustozi bo`lgan Mavjuda Rajabova yig`ilganlarga “Huquqshunoslik fanining Buxoro tarixidagi o`rni” mavzusida ma’ruza qildi. Uchrashuv mobaynida yosh yuristlar o`zlarini qiziqtirgan savollar bilan olimaga murojaat qilishdi.
Ma’lumot o`rnida aytish joizki, Olima O‘zbekiston Respublikasi prokuraturasi Qonunchilikni mustahkamlash muammolari va prokuror - tergov xodimlari malakasini oshirish markazi direktorining o‘quv ishlar bo‘yicha o‘rinbosari (1996 - 2000), jinoyat ishlari bo‘yicha Toshkent shahar Yakkasaroy tumani sudining raisi ( 2000 - 2005), O‘zbekiston Respublikasi Oliy Majlisi Senati Qonunchilik va sud - huquq masalalari qo‘mitasining raisi (2005 - 2009), O‘zbekiston Respublikasi Oliy Majlisi Senati Raisining o‘rinbosari (2010 - 2014) lavozimlarida faoliyat ko‘rsatgan. Hozirda Mavjuda Rajabova Ichki Ishlar Vazirligi Akademiyasining “Jinoyat protsessi” kafedrasi professori lavozimida ishlab, huquqni muhofaza qiluvchi organlarga yuksak ma’naviyatli, bilimli kadrlarni tayyorlashda hissasini qo‘shmoqda.
