Har yili 9-fevralni ayniqsa xalqimiz zo‘r iftixor bilan kutib oladi. An'anaga aylangan ushbu kunda mamlakatimizning barcha ilm dargohlarida Navoiy hayoti va ijodiga bag‘ishlangan ilmiy anjumanlar, uchrashuvlar, ma'naviy-ma'rifiy tadbirlar, navoiyxonlik va she'riyat kechalari bo‘lib o‘tadi.
Bugun erta tongda Buxoro davlat universitetida Hazrat Navoiyga o‘rnatilgan byust qarshisida Buxoro Yozuvchilar uyushmasi raisi, shoir Shodmon Sulaymon, O`zbekiston Respublikasi Ma'naviyat-ma`rifat markazi Buxoro viloyati bo`limi rahbari Marhabo Pardayeva, Milliy gvardiya Buxoro viloyat qo'riqlash boshqarmasi xodimlari, jamoatchilik vakillari, BuxDU rektori Obidjon Xamidov boshchiligidagi universitet rahbariyati, professor-o`qituvchilar, talaba-yoshlar to`planishdi.
Hazrat Navoiyga ehtirom yuzasidan byust poyiga gulchambar qo‘yilib, hurmat bajo keltirildi.
Shundan so'ng Buxoro davlat universitetida faollar yig'ingohida g‘azal mulkining sultoni Alisher Navoiy tavalludining 582 yilligiga bag‘ishlangan "Ajdodlardan meros avlodlarga ibrat alloma" nomli bayram kechasi bo‘lib o‘tdi.
Dastlab BuxDU rektori, iqtisod fanlari doktori O.X.Xamidovning alloma tavalludining shodiyonalariga tabrik so'zi bilan ochib berildi.
Butun umrini turkiy tilning nufuzini ko`tarish, turkiy davlatchilik asoslarini mustahkamlash, mushtarak tushunchalar - mehr-oqibat, do`stlik, insoniylik, vatanparvarlikni tarannum etish hamda haqiqat va adolatni qaror toptirishga bag`ishlagan hazrat Navoiy bizning hurmatimiz, e'tirofimiz, e'zozimizga hamisha munosib. Alisher Navoiy orzusidagidek jamiyat barpo etish, hazratdek komil ustoz, mukarram inson bo`lish har birimizning avlodlik burchimiz, desam aslo mubolag`a bo`lmaydi.
Obidjon Xamidov,
BuxDU rektori
Shuning bilan birga, “Makorim ul-axloq”da Alisher Navoiy shaxsiyati talqini”, mavzusida filologiya fanlari doktori, dotsent Sh.A. Hayitovning ma’ruzasi tinglandi.
Cholg‘u asboblarining sokin sadosi ostidagi tadbir davomida talablar tomonidan sahna asarlari, g‘azallar, mumtoz musiqa sadosi ostidagi raqslar namoyish etildi.
