Prezidentimizning Oliy Majlis hamda O‘zbekiston xalqiga Murojaatini hayajon va iftixor bilan tingladik. Yangi orzu-umidlar bilan qarshilayotgan yilimizning “Insonga e’tibor va sifatli ta’lim yili” deb nomlanishi, tom ma’noda, ta’lim sohasida boshlagan islohotlarimizni davom ettirishga, ta’limning barcha tur hamda bosqichlarida sifat va samaradorlikni oshirishga bel bog‘lash uchun alohida da’vat bo‘ldi.
Yurtboshimiz Murojaatnomada mamlakatimiz milliy rivojlanishning yangi davriga dadil qadam qo‘yayotgani, hayotimizning barcha jabhalarida ulkan o‘zgarishlar yuz berayotganini ta'kidlab o‘tar ekan, shu o‘rinda ta'limni qo‘llab-quvvatlash o‘qituvchilarning maqomini, ularning sha'ni va qadr-qimmatini himoya qilishni Konstitutsiyada alohida belgilash zarurligini qayd etdi.
Murojaatnomada chet tillarini mukammal o`rganishga ham alohida to`xtalib o`tildi. Buyuk mutafakkir shoirimiz Mir Alisher Navoiy o‘z davrida yoshlarga murojaat qilib, “Quyoshliq istasang, kasbi kamol et”, deb yozganlar. Chindan ham, odamlarga quyoshdek beminnat nur taratishni, yaxshilik qilishni istaydigan inson, kamolotga intilib, turli ilm va kasb-hunarlarni o‘zlashtirishi lozim.
Hozirgi davrda xorijiy tillarni mukammal o‘rganmasdan turib, buyuk bobomiz aytgan ana shunday marralarga erishib bo‘lmaydi, desak, adashmagan bo‘lamiz. Bunday o‘tkir talabga amal qilib, kelgusi yilda fizika va chet tillarini o‘rganishni ustuvor yo‘nalish etib belgilashni taklif etdilar. Shu maqsadda kelgusi yilda ta’limning barcha bo‘g‘inlarida ushbu fanlarni o‘qitish sifatini tubdan oshirish, ixtisoslashgan maktablar ochish, malakali pedagoglarni jalb etish kabi tizimli ishlar amalga oshiriladi.
Yuksak saviyadagi ilm-fan, ijtimoiy hayotimizga teran mazmun baxsh etuvchi ta’lim, ota-bobolarimizdan meros tarbiya yurtimizni qudratli, millatimizni buyuk qiladigan cheksiz kuchdir. O‘tgan yillar davomida mamlakatimizda o‘qituvchi-murabbiylar, o‘quvchi va talabalar majburiy mehnatning har qanday ko‘rinishidan ozod qilinishiga erishildi. Ta’lim muassasalaridagi o‘qish sifatiga ta’sir qiluvchi ortiqcha qog‘ozbozliklarga barham berildi. Bugun ta’lim sohasida boy berilgan vaqtni quruq gaplar bilan emas, o‘qitish sifatini oshirish, samaradorlikning o‘sishi evaziga to‘ldirishimiz zarurligi ta'kidlandi. Ta’lim, ayniqsa, oliy ta’lim mamlakatimiz kelajagini, yuksak taraqqiyotini belgilab beradigan, ijtimoiy turmushning barcha jabhalarini isloh etishda hal qiluvchi vazifani bajaradigan tayanch tizimdir. Oliy ma’lumotga ega bilimli, yuksak malakali mutaxassislar qancha ko‘p bo‘lsa, sohalar kesimida rivojlanish hamda samaradorlik ham shuncha oshadi. Zero, ta’lim sifatining o‘sishi har bir sohada o‘zgarish, rivojlanish kalitidir. Ijtimoiy davlat bu, eng avvalo, inson salohiyatini ro‘yobga chiqarish uchun teng imkoniyatlar, odamlar munosib hayot kechirishiga zarur sharoitlar yaratish, kambag‘allikni qisqartirish, demakdir.
Shu bois, birinchi navbatda, e’tiborni Yangi O‘zbekiston uchun eng katta investisiya bo‘lgan ta’limni qo‘llab-quvvatlashga qaratish kerakligi ta'kidlandi. “Najot – ta’limda, najot – tarbiyada, najot – bilimda. Chunki, barcha ezgu maqsadlarga bilim va tarbiya tufayli erishiladi”. Ma’rifatparvar jadid bobolarimizning bu so‘zlari deputat va senatorlarimiz, siyosiy partiyalar, mahalliy kengashlar, butun davlat apparati, keng jamoatchilikning amaliy harakatiga aylanishi kerak. Shu bois, maktablarda ta’lim sifati hamda jamiyatda o‘qituvchi kasbining nufuzini oshirish, muallimlarning sharoitlarini yaxshilash 2023 yildagi eng asosiy vazifalarimizdan biri bo‘ladi.
O‘qituvchilarning maqomini, ularning sha’ni va qadr-qimmatini himoya qilishni Konstitutsiyada alohida belgilash kerakligi aytildi.
Xulosa o‘rnida shuni aytish joizki, Murojaatnoma, chindan, Yangi O‘zbekistonning yangi shahodatnomasi. Unda barcha sohalarning rivojlanishi uchun muhim istiqbolli dasturlar belgilangan. Eng ustuvor jihati esa insonga bo‘lgan e'tibordir. Qayerdaki insonga e'tibor bo‘lsa, o‘sha joyda yuksalish, adolat, taraqqiyot, tinchlik, bunyodkorlik bo‘ladi.
N.B. Ataboyev
Xorijiy tillar fakulteti dekani f.f.f.d (PhD), dotsent.
