Buxoro davlat universitetida “XIX asr oxiri-XX asr boshlarida Buxoro” mavzuida respublika ilmiy-nazariy anjumani o’tkazildi. Unda mamlakatimizdagi turli oliy o’quv yurtlarining professor-o’qituvchilari, tarixchi olimlar, tadqiqotchilar ishtirok etdi. Respublika Oliy va o’rta maxsus ta’lim vazirligi hamda BuxDUning o’zaro hamkorligida o’tgan ushbu konferensiya atoqli tarixshunos, o’tmishimizning zukko bilimdoni, professor Farhod Qosimov tavalludining 75 yilligiga bag’ishlandi. Unda so’zga chiqqan universitet rektori, texnika fanlari doktori Abduqobil To’laganov bu kabi anjumanlarning moziy ilmi rivojidagi roli va ahamiyati borasida o’z mulohazalarini o’rtoqlashdi.So’ng anjuman 4 sho’baga bo’lingan holda davom etdi. Ularda Buxoro zaminida bundan bir asrcha muqaddam ro’y bergan muhim voqealar, madaniyat, maorif, matbuot va boshqa sohalarda o’sha paytlarda amalga oshirilgan ishlar, etnoijtimoiy jarayonlarga oid ma’ruzalar tinglandi. Xususan, BuxDUning tarix kafedrasi professori, tarix fanlari doktori Shodmon Hayitov, Navoiy davlat pedagogika instituti professori Sulaymon Inoyatov, Farg’ona davlat universiteti dosenti Ahmadjon Salmonov va boshqalar tomonidan vohamizda tarixshunoslik ilmiy maktabi rivoji, XX asr boshlaridagi Buxoro Maorif uyi, boshqaruv muassasalariga doir qilingan chiqishlar yig’ilganlarda katta qiziqish uyg’otdi.-Bugungi ilmiy anjuman nisbatan yaqin o’tmishizni yanada chuqurroq o’rganishda, bu boradagi tadqiqot natijalarini umumlashtirishda muhim bosqich vazifasini o’tadi,-deydi BuxDUning tarix mutaxassisligi magistranti Shavkat Bobojonov.-Shu bilan bir qatorda u mazkur jabhada kelgusida qilinajak ishlarni belgilab olish imkonini ham berdi.Rustam Ibragimov, “Buxoronoma” muxbiri.
