Viloyatimizning turistik salohiyatini yanada oshirish, ziyoratgohlarimiz imkoniyatlarini to‘liq ishga solish, xorijiy sayyohlarni jalb qilish, xorijiy turistik kompaniyalar va islom dini tashkilotlari mas’ullari bilan joyida o‘zaro samarali hamkorlik kelishuvlariga erishish hamda faol targ‘ibot tadbirlarini olib borish maqsadidagi delegatsiya Malayziya va Indoneziya davlatlariga xizmat safariga jo`nab ketdi.
Buxoro davlat universiteti rektori Obidjon Xamidov hamda xorijiy tillar fakulteti dekani Nozimjon Ataboyevlar ham ushbu delegatsiya tarkibida Malayziya davlatida xizmat safarida bo`lib turibdi.
Ayni paytda tashrif buyurilgan shahar Malayziyadagi birinchi to‘liq integratsiyalashgan yashil shahar bo‘lib, yashil shaharsozlik indeksi tomonidan sertifikatlangan. Hududda savdo va ko‘ngilochar markazlar, tibbiyot maskanlari, nufuzli universitetlar, 11 mingdan ortiq turar joy majmualari, xiyobonlar, mehmonxona, restoran va kongress xol, akvapark kabi turli komponentlardan iborat aqlli shahar barpo etilgan. Janubiy-sharqiy Osiyodagi eng yirik turizm markazlaridan biri bo'lgan mazkur shahar, yiliga 42 million xorijiy sayyohlar tashrifini qamrab oladi.
Tashrif davomida, Buxoro Davlat Universiteti va "Malayziya Sunway University" o‘rtasida davra suhbati o'tkazildi. Suhbatda O'zbekistonning Malayziyadagi elchixonasi vakillari, O.X.Xamidov, va delegatsiya a'zolari ishtirok etgan tadbirda, ta’lim sohasida o‘zaro hamkorlik memorandumi imzolanishiga kelishib olindi.
