Qadrli jurnalistlar, OAV xodimlari! Bugungi kun nuqtayi-nazaridan eng og`ir va mas’uliyatli kasb egasi, shubhasiz, sizlarsiz! Kecha-kunduzda sodir bo`layotgan islohotlar, yangiliklardan tezkorlik va xolislik bilan o`z vaqtida boxabar qilayotganingiz, har bir rahbar faoliyatini xolisona yoritib, ochiqlik va shaffoflikni ta’minlashda katta natijalarga erishayotganingiz, eng muhimi, faoliyatingiz vatanparvarlik asosiga qurilgani tahsinga sazovor.
So`nggi yillarda so`z aytish va fikriy erkinlik borasida qilinayotgan ishlar kishini quvontiradi. Bu borada matbuot ahli, jurnalistlarning o`z fikrini, tahlillarini erkin bayon etishi, o`zi qiziqqan sohada jurnalistik surishtiruvlar olib borishi, islohotlarga odob-axloq doirasida munosabatini bildirishi, muxtasar qilib aytganda, O`zbekiston jurnalistikasining jahon axborot maydonida munosib o‘rin egallashi uchun mustahkam poydevor yaratildi.
Shu ma’noda bugungi kunda erishilayotgan har bir yutuqda ommaviy axborot vositalarining hissasi bor va bundan so`ng ham ularning jamiyat rivojidagi o`rni suv va havodek zarur, desak also mubolag`a bo`lmaydi.
Yangi O`zbekistonning yangicha fikrli, kreativ va tezkor, adolatni mezon qilgan jurnalistlari, matbuot xodimlari! Bosma nashr yoxud muxbirmisiz, telejurnalist yoki radioboshlovchimisiz, operator yoki matbuot xizmati xodimi bo`lasizmi, xullas, har biringiz millat buguni va ertasi uchun ahamiyatlisiz! Iste’dodingiz, salohiyatingiz, haqiqatni yuzaga chiqarishdagi faoliyatingiz taraqqiyotimizni ta’minlaydigan omildir.
Har bir rahbar faoliyatini, xususan, Oliy ta’lim muassasasi hamda ta’lim tizimi sohasidagi yangiliklarni yoritishda OTM matbuot kotiblarining xizmati benihoya katta. Qilinayotga ishlar tezkorlik va xolislik asosida yoritilar ekan, ijodkor va ixtirochi talabalar, qobiliyatli yoshlar respublika miqyosida tanitilib borilar ekan, ish sifati oshadi, ulardan ruhlanib, o`z ijodini namoyon etadigan yoshlar safi kengayadi.
Hayotga doim sergak ko`z bilan qaraydigan jurnalistlar, Vatan manfaati yo`lida tinmayotgan matbuot ahli! Barchangizni yana bir bor kasb bayramingiz chin qalbdan qutlayman. Qalamingiz o‘tkir, so‘zlaringiz ravon, chiqishlaringiz ta’sirchan bo`lib, hamisha xalq ardog`ida yuring. Mashaqqatli va oliyjanob faoliyatingizda ulkan muvaffaqiyatlar tilayman. Sihat-salomatlik, baxt-u saodat, ijodiy barkamollik hamisha yor bo`lsin.
Bayramingiz muborak bo‘lsin!
Xamidov Obidjon Xafizovich
Buxoro davlat universiteti rektori,
iqtisodiyot fanlari doktori, professor
