Bugun Buxoro davlat universiteti rektori Obidjon Xamidov boshchiligida rahbariyat vakillari, barcha fakultet dekanlari BuxDuning Qorako`l akademik litseyiga "Ochiq eshiklar kuni" munosabati bilan tashrif buyurishdi. Tashkil etilgan ochiq eshiklar kunida Qorako`l tumani hokimi Xurshid Toxirov ham ishtirok etdi.
Mehmon sifatida tashrif buyurgan BuxDU rahbariyati, fakultet dekanlari tomonidan Qorako`l akademik litseyi bitiruvchilari uchun ko`rgazma tashkil etildi. O`quvchilarga yaqin kunlarda o`qishga kirishi uchun tanlov masalasida yetarlicha ma’lumot olishlari maqsadida tashkil etilgan ko`rgazmada har bir yo`nalish yuzasidan kengroq tushuntirish berildi.
Uchrashuv davomida akademik litsey bitiruvchilarining “Bitiruv kechasi” o`tkazildi. Xayrlashuv tadbiri davomida Qorako`l tumani hokimi Xurshid Toxirov, BuxDU rektori Obidjon Xamidov hamda bir guruh BuxDU rahbariyati vakillari bitiruvchi o`quvchilarga diplomlarni topshirishdi.
Uchrashuv mobaynida o`quvchilarga BuxDUning ilmiy salohiyati, joriy o`quv yilida qabul shakllari, alohida iqtidor talab etiladigan va barcha yo`nalishlar, qabul kvotalari taqsimoti, fakultetlar, magistratura bosqichi, imtihon dasturlari, imtihon jarayoni haqida batafsil ma’lumot berildi.
Ma’lumot o`rnida aytish joizki, dunyoda dong`i taralgan BuxDU Qorako`l akademik litseyi o`quvchilari to`rt yo`nalishda, ya’ni aniq fanlar (texnika), aniq fanlar (iqtisod), tabiiy fanlar hamda xorijiy fanlar (ingliz tili) bo`yicha tahsil olmoqdalar. Bugungi kunda litseyda jami 397 nafar o`quvchi tahsil olmoqda. Respublika miqyosida o`tgan o`quv yilida o`qishga kirish ko`rsatkichi bo`yicha 98,6% natija ko`rsatib, yetakchilikni egalladi. 2021/2022-o`quv yilida ingliz tili fanidan akademik litsey o`quvchilarining 75 nafaridan 70 tasi IELTS hamda B2 sertifikatini qo`lga kiritishgan.
Uchrashuvda ilm-fan bobida dunyoni hayratga solayotgan BuxDU Qorako`l akademik litseyining joriy yilgi natijalari kutilgandan-da a’loroq bo`lishiga ishonch bildirishdi. Bitiruvchilarga kelgusidagi o`qish va izlanish yo`lida muvaffaqiyat va zafarlar tilandi.
