Sharif shahrimiz Buxoro osori-atiqalari, dunyoni chorlayotgan bebaho moddiy va madaniy merosidan tashqari o`zining bebaho farzandlari – dunyo tan olgan allomalari bilan ham qiymatli. Ayniqsa, islom olamida yuksak sharaf qozongan, Islom sivilizatsiyasiga o`z hissasini qo`shgan ilm egalarimizning hali hayoti va ijodi o‘rganilmagan, xalqqa to‘la yetkazilmagan buyuklari qancha. Shulardan biri ‒ Abu Hafs Kabir Buxoriydir. Abu Hafs Kabir Buxoriy - uning muborak nomini muhtaram Prezidentimiz Shavkat Mirziyoyev Toshkent shahrida Islom taraqqiyot banki boshqaruvchilar kengashining to‘g‘ridan-to‘g‘ri o‘tkazilgan, 57 mamlakatdan vazirlar va rasmiy shaxslar, shuningdek, mamlakatimiz vazirlik va idoralari mutasaddilari, ishbilarmon doira vakillari qatnashgan 46-yillik yig‘ilishidagi nutqida faxr bilan tilga olganining o`zidayoq bu alloma haqida tadqiqotlar, ilmiy maqolalar, e’lon qilina boshladi. Ana shu ezgu yo`lda bugun Buxoro davlat universitetida bo`lib o`tgan "Ahmad Ibn Hafs Kabir Buxoriy merosi va uning ilk Sharq Renessansi hamda islom falsafasi ilmiy-nazariy asoslarini yaratishdagi o‘rni va ahamiyati" mavzusidagi xalqaro ilmiy-amaliy konferensiya ana shu qadri baland fazl egasining hayoti va faoliyatini, ilm-ma’rifatga qo`shgan hissasini keng yoyishga bag`ishlandi.
Xalqaro ilmiy konferensiyada Qohira universiteti professori Ubayd Muhammad, Buxoro shahar Jo`ybori kalon ayol-qizlar madrasasi direktori, islomshunoslik fanlari bo`yicha falsafa doktori (PhD) Azizxo`ja Inoyatov, Tojikiston Respublikasi Panjikent pedagogika instituti ilmiy-ishlar va innovatsiyalar bo`yicha prorektori, professor Shodmon Vohidov, AQSHning Michigan davlat universiteti professori Timurxo`ja Usmonxo`ja o`g`li, Javoharlal Nehru universiteti professori Akhlaque Ahan, Boshqirdiston davlat universiteti professori Gyuzel Vildanova kabi o`ttizdan ortiq xalqaro hamda respublika miqyosidagi olimlar, Buxoro davlat universitetining professor-o`qituvchilari Abu Hafs Kabir Buxoriy, Imom Termiziy, Imom Buxoriy, Sharq renessansi, islom falsafasi kabi bir qator mavzularda o`z ma’ruzalari bilan ishtirok etishdi.
– Assalomu alaykum, hurmatli anjuman ishtirokchilari! Xalqaro anjumanda bevosita va onlayn qatnashayotgan hamkor davlatlar hamda nufuzli xalqaro tashkilotlar vakillari! Yetakchi olim va ekspertlar! Islom hamkorlik tashkilotining Islom tarixi, san’ati va madaniyatini tadqiq etish markazi Bosh Direktori ilmiy maslahatchisi, professor hurmatli Ashirbek Mo‘minov (Turkiya), Islom hamkorlik tashkilotining Departament boshlig‘i, professor Bashir Ahmad Ansoriy (AQSH), Michigan universiteti professori Temurxo‘ja Usmonxo‘ja (AQSH), Qohira universiteti professori Ubayd Muhammad (Misr), Javoharla’l Neru universiteti professori Axloq Ahmad Ohan (Hindiston) va boshqa hurmatli taniqli olimlar, sizlarni anjumanda onlayn ko‘rib turganimdan bag‘oyat xursandman, - deya mamnuniyat izhor etdi Buxoro viloyat hokimi Botir Komilovich Zaripov anjuman ulug‘ ustoz boy ilmiy-ma’rifiy merosini o‘rganish, uni barcha ilm muhiblariga targ‘ib etishda muhim ahamiyat kasb etishini ta’kidlash asnosida.
– Abu Hafs Kabirning shuhrati Buxoroga, qolaversa, butun islom olamiga tarqaldi. Olimlar uning ilmi fazlini baholab, Abu Hafs Kabirni “Muallimi islom”, ya’ni “Islom dinining muallimi”, uning sharofati bilan Buxoroni “Qubbat ul-islom” (Islom dinining gumbazi) va olim yashaydigan mahalla darvozasini “Haqroh” (Haq yo‘l) deb atagan, - deya allomaning buxorolik ekanligi bilan faxr his etishini aytdiBuxoro davlat universiteti rektori, iqtisodiyot fanlari doktori, professor Xamidov Obidjon Xafizovich.
Albatta, ulug‘ allomalarimizning boy merosini asrab-avaylash, o‘rganish, islom ma’rifati to‘g‘risidagi ta’limotini keng yoyish hamda uni keyingi avlodlarga yetkazish sharafli ishdir. Xalqaro konferensiyada ayni jihatlar alohida tilga olindi.
