Ma’lumki, O‘zbekiston Respublikasi Prezidentining 2021-yilning 24-dekabr kuni qabul qilingan “Davlat oliy ta’lim muassasalarining akademik va tashkiliy-boshqaruv mustaqilligini ta’minlash bo‘yicha qo‘shimcha chora-tadbirlar to‘g‘risida” PK-60-sonli qarori, Shuningdek, “Davlat oliy ta’lim muassasalariga moliyaviy mustaqillik berish chora-tadbirlari to‘g‘risida”gi 61-sonli qarorlari oliy ta’lim tizimini 2030-yilgacha rivojlantirish konsepsiyasida belgilangan vazifalar ijrosini izchil ta’minlash, shuningdek, oliy ta’lim muassasalarining mustaqilligini kengaytirish, ular faoliyatida davlat ma’muriy boshqaruvini keskin kamaytirish hamda shu orqali o‘zgaruvchan mehnat bozori talablariga javob bera oladigan yuqori malakali kadrlar tayyorlovchi davlat oliy ta’lim muassasalarini shakllantirishga qaratilgan. Qolaversa, mazkur qarorlar oliy ta’lim tizimida amalga oshirilayotgan islohotlar samaradorligini oshirish, davlat oliy ta’lim muassasalarining moliyaviy barqarorligini ta’minlash, moddiy-texnika bazasini mustahkamlash masalalarini mustaqil hal etish, ilmiy-tadqiqot faoliyatiga mablag‘larni jalb etish imkoniyatini kengaytirish hamda oliy ta’lim muassasalari o‘rtasida raqobat muhitini rivojlantirish borasida ulkan imkoniyatlarni ochib bermoqda. Mazkur yo‘nalishlarda Buxoro davlat universiteti respublikaning boshqa yetakchi OTMlari bilan yaqindan hamkorlik qilib, tajriba almashish ishlarini yo‘lga qo‘ygan. Xususan, joriy yilning birinchi choragida universitet prorektorlari va bo‘lim boshliqlari Toshkent davlat iqtisodiyot universiteti va Toshkent davlat yuridik universitetlarida bo‘lib, ish yuritish, ijro intizomi samaradorligi ta’minlash, o‘quv-uslubiy va ilmiy-tadqiqot sohalardagi ijobiy yutuqlar bilan tanishib kelishgan edi.
2022-yilning 29-30 aprel kunlari Toshkent davlat yuridik universiteti Kadrlar bo‘limi boshlig‘i Shavkat Hamroqulov, Monitoring va tashkiliy nazorat boshqarmasi boshlig‘i Durbek Mahkamov, O‘quv bo‘limi boshlig‘i Soxib Rajabboyevlar Buxoro davlat universitetiga tashrif buyurishdi. Universitetning fakultet dekanlari, kafedra mudirlari va bo‘lim boshliqlari bilan o‘tkazilgan o‘quv-seminar davomida kredit-modul tizimi, ijro –intizomi, elektron ish yuritish, professor-o‘qituvchilarning KPI ko‘rsatkichlarini shakllantirish masalalariga oid ma’lumotlar berildi. Seminarda berilgan amaliy tavsiyalarning amaliyotga joriy etilishi natijasida universitet faoliyati samaradorligini yanada yuksaltirish, universitetda raqobat muhitini takomillashtirish, har-bir xodimning mas’uliyat darajasini oshirishga xizmat qilishi e’tirof etildi. Yuqoridagilar bilan birga, Yuridik universitet vakillari Buxoro davlat universitetida ishlab chiqilgan UNIWORK dasturiy mahsulotning imkoniyatlari bilan tanishib, uning afzallik va qulaylik jihatlarini ommalashtirish lozimligini ta’kidlashdi. Tashrif yakunida tajriba almashinish an’anasini onlayn tarzda davom ettirishga kelishib olindi.
