O'sib kelayotgan yosh avlodga har tomonlama ma'nan va jismonan chuqur aqliy bilimga ega bo'lishlari uchun yurtimizning barcha ta'lim muassasalarida qulay imkoniyatlar yaratib berilgan. Kelajagimiz davomchilari bo'lgan bitiruvchilarimiz ushbu imkoniyatlardan unumli foydalanib, kasb tanlashda adashmasdan, ustozlari bergan bilimlarni qay tarzda davom ettirishlari ham ixtiyoriy tanlovlaridir.
Buxoro davlat universitetiga viloyatimizning turli hududlaridan 44 ta umumiy o`rta ta’lim maktablari, akademik litsey, texnikumlardan 2000 nafardan ortiq bitiruvchilar, ularning ota-onalari ana’anaviy tarzda o`tkazilib kelinayotgan “Ochiq eshiklar kuni” munosabati bilan tashrif buyurishdi.
Umumiy o`rta ta’lim maktablar faoliyatini takomillashtirish, o‘quvchilarning ilm-fan va kasb-hunarga bo’lgan qiziqishlarini kuchaytirish, universitet va maktablar o’rtasidagi o’zaro hamkorlik aloqalarini mustahkamlash maqsadida tashkil etilgan “Ochiq eshiklar kuni“da Buxoro davlat universiteti orzu-umidlarga to`la ko`zlari bilan har bir ma’lumotni diqqat bilan eshitayotgan bo`lajak talabalar sababli fayzga to`ldi. Tashrif buyurgan mehmonlarga universitetimiz haqida batafsil ma’lumot berildi.
Buxoro davlat universiteti faollar yig`ingohida “Kelajakda kim bo`lmoqchisiz? Siz tanlagan soha butun umringizga tatishi kerak, sizning tanlovingiz kelajagingiz uchun muhim!” deya mehmonlarga yuzlangan Yoshlar masalalari va ma'naviy-ma'rifiy ishlar bo`yicha prorektori Arif Kadirov Buxoro davlat universitetidagi bor imkoniyatlar xususida mehmon bitiruvchilarga ma’lumot berdi. Talabalar turar joyida yaratilgan shart-sharoitlar, o’quv zali, ma’naviyat va ma’rifat xonasi, madaniy dam olish xonalari, sport seksiyalari, fan va badiiy havaskorlik to’garaklari xonalari, maishiy xizmat xonalari, "Zakovat" o`yinlari o`tkazish uchun yaratilgan sharoit, “Besh muhim tashabbus” yo‘nalishlari bo‘yicha to‘garak xonalarining mavjudligi, kutubxona hamda talabalarga psixologik yordam berish xizmati faoliyati holati haqida batafsil to`xtaldi.
Shundan so`ng, Buxoro davlat universitetidagi har bir fakultet dekani o`z fakulteti faoliyati, salohiyati yuzasidan taqdimot qildi. San’atshunoslik fakulteti talabalari tomonidan kuylangan qo`shiqlar, ijro etilgan raqslar mehmonlarga iliq taassurot qoldirdi.
Jurnalistika sohasida ishlashni bolaligimdan orzu qilaman, – deydi Buxoro shahridagi 39-IDUM o`quvchisi Shahnoza. – Bugungi uchrashuvda kelajakdagi kasbim – Jurnalistika yo`nalishi haqida juda ko‘p foydali ma’lumotlarga ega bo‘ldim. Yana shuni anglab yetdimki, bu soha BuxDUda yangi ochilgan ekan, o‘ta mas’uliyatli, shuning barobarida faxrli kasblardan birining Buxoroda borligi quvontirdi. Uchrashuvdan olgan taassurotlarim kelgusi rejalarimni tuzishimda muhim ahamiyat kasb etdi.
Ma'lumot o`rnida aytish joizki, Buxoro davlat universiteti tarkibiy tuzilmasida 30 ta bo‘lim va markazlar, 12 ta fakultet, 38 ta kafedra faoliyat yuritib kelmoqda. Universitetda 24 336 nafar (jumladan, 23056 nafari bakalavriat, 1280 nafari magistratura) talaba tahsil olib, ularning 16431 nafari bakalavriat kunduzgi, 4951 nafari sirtqi, 748 nafari kechki, 926 nafari 2-mutaxassislik, hamda 1280 nafari magistratura bosqichida o‘qimoqda. Xorijiy hamkorlar bilan 13 ta qo‘shma ta’lim dasturlari yo‘lga qo‘yilgan bo‘lib, ayni paytda ularda 300 nafarga yaqin talaba tahsil oladi. Universitet huzurida falsafa doktori (PhD) ilmiy darajasini beruvchi 14 ta ixtisoslik bo‘yicha jami 8 ta kengash faoliyat ko‘rsatadi. 2021 yilda universitetda faoliyat ko‘rsatayotgan pedagog xodimlardan 13 nafari fan doktori (DSc), 43 nafari falsafa doktori (PhD) doktorlik dissertatsiyalarini muvaffaqiyatli himoya qildi. 2022-yilda jami 60 nafar ilmiy pedagog-xodimlarning doktorlik dissertatsiyalari himoyalari rejalashtirilgan.
TAʼLIM YO‘NALISHLARI
BuxDU universiteti rektori Obidjon Xamidov boshchiligidagi mutasaddilar o‘quvchilarga universitetda yangi o‘quv yili uchun abituriyentlar qabuliga oid yangiliklar bilan o`rtoqlashdilar. Respublika miqyosida eng ko`p talaba tahsil olayotgan Buxoro davlat universitetiga “Ochiq eshiklar kuni” munosabati bilan qilingan ekskursiya o`quvchilarning kelajak rejalarini belgilashida muhim omil bo`ldi.
BuxDU Matbuot xizmati
