Buxoro davlat universiteti katta faollar yig`ingohida “Tasviriy oyina” ijodiy uyushmasi tomonidan ijtimoiy-ma’naviy muhitni sog`lomlashtirish, diniy bag`rikenglik hamda millatlararo totuvlikni mustahkamlash maqsadida “Ekstremizm va terrorizm, missionerlik g`oyalariga qarshi ogohlik va hushyorlik davr talabi” – nomli keng ko`lamli ma’naviy-ma’rifiy tadbir bo`lib o`tdi.
Unda “Tasviriy oyina” ijodiy uyushmasi xodimlari, Din ishlari bo`yicha qo`mitaning viloyat boshqarmasi, Musulmonlar idorasi, Oliy va o`rta maxsus ta’lim boshqarmasi, Xalq ta’limi boshqarmasi, Badiiy akademiya, Milliy madaniy markaz vakillari hamda Ommaviy axborot vositalari ishtirok etishdi.
Tadbir avvalida Buxoro davlat universiteti bosh binosida “Ekstremizm, terrorizm va missionerlikning mudhish qiyofasini fosh etuvchi “Ogohlik va hushyorlik davr talabi, ekstremizm, terrorizm va missionerlik – dahshatli ofat” mavzusida universitet ijodkorlarining sara asarlaridan iborat fotoko`rgazma hamda “San’atshunoslik fakulteti talabalarining “Ranglar jilosi” nomli shaxsiy ko`rgazmasi tashkil etildi.
Yot g‘oyalar, hozirgi zamon tahdidlariga qarshi samarali kurashishni tashkil etish, yoshlarni din niqobidagi mafkuraviy xavflardan saqlash va boshqa dolzarb masalalarda yoshlarning dunyoqarashini kengaytirish maqsadini ko`zlagan ushbu ma’naviy-ma’rifiy tadbir xavfsizlikka tahdid soluvchi vaziyatlarni bartaraf qilishga yo‘naltirilgan tizimli sa’y-harakatlarning amaliy davomi bo`ldi, desak also mubolag`a bo`lmaydi.
Ushbu tadbirda O`zbekiston Respublikasi “Tasviriy oyina” ijodiy uyushmasi tomonidan 10.000 nuxsada chop etilgan “Inson qadrini ulug`lash va faol mahalla yili taraqqiyot hamda farovonlik garovidir” nomli tavsiyalar kitobining taqdimoti ham bo`lib o`tdi.
Tadbirda so`zga chiqqan O`zbekiston Musulmonlari idorasi viloyat vakili Jobir Elov diniy ekstremizm, terrorizmga qarshi kurash – bugunning dolzarb vazifasi ekanligi, hozirgi kunda butun dunyoda ushbu uch ma’sh’um illatga qarshi kurash olib borilayotganligi haqida so‘z yuritdilar. Terrorizm begunoh insonlarni bevaqt o‘limiga sabab bo‘luvchi qattol va kechirilmas urush ekanligi, yomon kimsalar o‘z g‘arazli niyatlarini terrorizm, ekstremizm va missionerlik orqali amalga oshirishlari misollar bilan tushuntirildi.
– Mamlakatimizda olib borilayotgan keng ko‘lamli islohotlar markazida, avvalo, inson qadri, uning huquq va erkinliklarini ta’minlash maqsadi turadi. Fuqarolar manfaatlarini faqatgina tinchlik va osoyishtalik, o‘zaro hurmat, mehr-oqibat va hamjihatlik muhitini yaratish orqali ta’minlash mumkin. Prezidentimiz Shavkat Mirziyoyev tashabbusi bilan yurtimizda so‘nggi yillarda bu borada amalga oshirilgan islohotlar va uning natijalari xalqaro hamjamiyat tomonidan yuqori baholanayotir. Binobarin, mamlakatimizda turli millat va konfessiyalar o‘rtasida o‘zaro hurmat, birdamlik va hamkorlik muhitini mustahkamlash, madaniyatlararo muloqotni qo‘llab-quvvatlash hamda tinchlik va totuvlikni ta’minlashga oid izchil va puxta o‘ylangan siyosat xalqaro hamjamiyat tomonidan to‘liq qo‘llab-quvvatlanmoqda,” – dedi BuxDU rektori Obidjon Xamidov mavzu doirasida o`z fikrlarini bildirar ekan.
Ushbu ma’naviy-ma’rifiy tadbirda so`zga chiqqan har bir ma’ruzachi mavzuning turli qirralari xususida mushohada yuritar ekan, yurtimizda hukm surayotgan tinch va osuda hayotni asrash, uning mustaqilligi va barqarorligiga munosib hissamizni qo'shish – har birimizning, shu aziz Vatanda yashayotgan turli millat va din vakillarining eng asosiy vazifalaridan bo'lishi lozimligi anglashildi.
